İli Tovuz-Şamaxı səfəri ilə bitirdik. 

Tovuzda bir-birindən maraqlı iki oyuna - "Kəpəz" - "Sumqayıt" və "Turan Tovuz" - "Neftçi" qarşılaşmalarına şahidlik etdik. Hər iki matçda qərb təmsilçiləri qələbəyə yaxın olsa da, yekunda heç-heçə qeydə alındı. 

İki gənc və perspektivli məşqçinin - Azər Bağırov və Vaqif Cavadovun bir-birinə qarşı ilk görüşündə qol vurulmadı. 

"Kəpəz"in demək olar ki, birqapıya oynadığı matçda gəncəlilərin bəxti gətirmədi. Burda "Kəpəz"in futbolçularının yarıhəvəskar səviyyədə olması nəticəyə təsir edən əsas amil idi. Nominal meydan sahibləri çoxlu qol epizodu yaratsa da, həlledici zərbəni vura bilmədilər. 
Etiraf etmək lazımdı ki, "Sumqayıt"ın futbolçularının, xüsusən legionerlərinin səviyyəsi də yüksək deyil. 

Qış fasiləsində hər iki komandanın əsaslı şəkildə güclənməyə ehtiyacı var.

"Turan Tovuz" və "Neftçi" də güclənməli klublardandı. Kurban Berdiyevin komandası son turda Azər Bağırovun kollektivi qədər böyük üstünlüyə malik olmasa da, "ağ qaralar"la oyunda əzmkar qələbəyə yaxın idi. 

Amma etiraf etmək lazımdı ki, "Turan Tovuz"un da futbolçularının keyfiyyəti böyük məqsədlər üçün mübarizə aparmağa yetmir. Buna görə də, tovuzlu azarkeşlərin ikinci hissədəki möhtəşəm dəstəyinə rəğmən meydan sabibləri 3 xal qazana bilmədi.

Şamaxıda keçirilən "Şamaxı" - "Sabah" oyununda isə əsl sensasiya qeydə alındı. Ayxan Abbasov Vasili Berezutskini baş məşqçi kimi məğlub edən ilk məşqçi kimi tarixə düşdü. Abbasov kiçik büdcəylə əla komanda formalaşdıra bilib. "Sabah" kimi güclü rəqib üzərində qələbə bunun növbəti nümunəsi idi.

Sözsüz ki, idman jurnalistlərinin regionlardakı oyunlara səfərləri PFL-in dəstəyi olmadan bu qədər kütləvi hal almazdı. Yalnız bu məqama görə yox, ümumiyyətlə, PFL-in gördüyü işlər təqdirəlayiqdi. Bu təşkilatın fəaliyyətində keçmiş media nümayəndələrinin xüsusi rol oynaması şəxsən mənim üçün ikiqat qürurvericidi. 
 
Vicdanla çalışan, dövlətə fayda verən hamını qarşıdan gələn Yeni İl münasibətilə təbrik edirəm!