"Neymar özünü təlxək kimi apardı"
"Santos" Braziliya kubokunun 1/8 final mərhələsində iki oyunun nəticəsinə əsasən "Remo"nu 1:0 hesabı ilə üstələyərək növbəti mərhələyə yüksəlib.
Qarşılaşmadan sonra "Santos"un hücumçusu Neymar davranışı ilə diqqət mərkəzinə düşüb. O, rəqib komandanın futbolçularını və azarkeşlərini təxribata çəkərək "Uduzdunuz!" deyə qışqırıb, həmçinin klubunun emblemini göstərərək sevincini nümayiş etdirib.
Sports.az "Goal"-a istinadən xəbər verir ki, oyundan sonra "Remo"nun prezidenti Antonio Karlos Teyşeyra Neymarın davranışını kəskin tənqid edib:
"Bizə qarşı ədalətsizlik edildiyi hissi qalır. "Santos"un buna ehtiyacı yox idi. Uşaqların kumiri olan kobud Neymar isə özünü təlxək kimi apardı, sonra da bizi təxribata çəkdi. Belə insanları ilahiləşdirdiyimiz üçün günah özümüzdədir".
34 yaşlı Neymarın "Santos"la müqaviləsinin müddəti 2026-cı ilin sonuna qədər nəzərdə tutulub.
