Mourinyo: "Mən üç ay istəyirəm"
“Real”ın baş məşqçisi Joze Mourinyo komandasının nəzərəçarpacaq dərəcədə inkişaf etməsi üçün nə qədər vaxta ehtiyac duyduğunu açıqlayıb.
Sports.az xəbər verir ki, portuqaliyalı mütəxəssis La Liqanın “Elçe” ilə oyunu öncəsi mətbuat konfransında bu barədə danışıb.
“Mən üç ay istəyirəm, digərləri isə 10 il istəyir... Bəlkə də fikrimi tam düzgün ifadə etmədim. Demək istəyirəm ki, üç aydan sonra hazırkı vəziyyətimizdən daha yaxşı olmağımızı istəyirəm. Amma üç ay ərzində inanılmaz səviyyəyə çatmağımıza imkan verəcək sehrli formul məndə yoxdur.
Hər oyunda və hər məşqdə məqsədimiz inkişaf etməkdir. Futbolçular nə qədər uzun müddət birlikdə çalışsalar və məşqçi komanda ilə nə qədər çox işləsə, komandanın daha da güclənmək imkanları bir o qədər çox olar”.
"Real" La Liqada 5 turdan sonra 12 xalla turnir cədvəlinin 2-ci pilləsində qərarlaşıb.
