"Qarabağ" liderini itirə bilər
"Olimpiakos"la bu mövsüm son avrokubok oyununa hazırlaşan "Qarabağ"ı aparıcı futbolçuların tərk edəcəyi ilə bağlı söz-söhbət səngimək bilmir.
İndi də Juninyonun gedişindən sonra komandanın lideri deyə biləcəyimiz Yassin Benzianın xarici klublardan təklif aldığı və getməyi düşündüyü haqda xəbərlər gəlir.
Bir neçə gün öncə anasını itirən əlcəzairli oyunçunun psixoloji durumunun yaxşı olmadığı, özünü xoşbəxt hiss etmədiyi bildirilir. Media Benzianın Qətər klubundan real təklifi olduğunu yazır.
"Qarabağ"ın "düşünən beyni" olan 30 yaşlı yarımmüdafiəçinin komandadan getmək istədiyi deyilən digər veteran legioner - Kevin Medina kimi klubla müqaviləsi bu yay bitir.
Ağdamlılar bu futbolçulardan az da olsa, qazanc əldə etmək istəyirsə, indi onları buraxmağın tam zamanı. Bir də, 5 ay sonra müqaviləsi bitən futbolçunun könlü yoxdursa, onu saxlamağın nə mənası?!
Benzianın bir müddət formasını geyindiyi "Olimpiakos"la matçdan sonra klubu tərk edib-etməyəcəyi bilinəcək.
Həmçinin Kevin Medina və başqalarının da taleyinə qış transfer pəncərəsi bağlananacan aydınlıq gələcək.
