Sərbəst güləşçilər reytinq turnirində 4 medal qazandı
Qırğızıstanın paytaxtı Bişkekdə güləş üzrə Reytinq Seriyasının 3-cü mərhələsi sona çatıb.
Sports.az xəbər verir ki, yarışın sonuncu günündə 5 sərbəst güləşçimiz mübarizə aparıb.
65 kq
Əli Rəhimzadə 1/8 finalda hindistanlı Kumar Anuja minimal fərqlə qalib gəlib – 7:6. Ancaq həmyerlimiz 1/4 finalda argentinalı Aqustin Destribatsla bacarmayıb - 1:3.
74 kq
Cəbrayıl Qadjiyev təsnifat mərhələsində misirli Amr Hussen (3:2), 1/8 finalda isə Bəhreyni təmsil edən Maqomedrasul Asluevlə (5:4) gərgin keçən qarşılaşmalarda sevinən tərəf olub. Yığma üzvü daha sonra gürcüstanlı Otari Baqauridən (4:1) güclü olmaqla adını yarımfinala yazdırıb. Tacikistanlı Maqomet Yevloyevlə gərgin keçən görüşdə sonuncu xal prinsipinə əsasən (3:3) qələbə qazanan Cəbrayıl finala adlayıb.
Bu çəkidə yer alan digər güləşçilərimiz mübarizəyə 1/8 finaldan başlayıb. Turan Bayramov çinli Fenq Lu (7:0), Xadjimurad Qadjiyev isə qazaxıstanlı Darxan Yessengali (10:0) üzərində böyükhesablı qələbə əldə edib. Bayramov 1/4 finalda türkiyəli olimpiya və 2 qat dünya üçüncüsü, 3 qat Avropa çempionu Soner Demirtaşı 10:5 hesabıyla, Qadjiyev isə monqolustanlı Suldxuu Olonbayarı "tuş"la məğlub edərək yarımfinala yüksəlib. Finalın bir addımlığında yığma üzvləri üz-üzə gəlib. Komanda yoldaşına 7:4 hesabıyla qalib gələn Turan finalda iştirak hüququ qazanıb.
Xadjimurad bürünc medal uğrunda Soner Demirtaşla qarşılaşıb və təcrübəli rəqibini 12:7 hesabıyla məğub edərək üçüncü yeri tutub. Finalda isə Turanla Cəbrayıl güləşib. Gərgin keçən qarşılaşmadan 2:1 hesablı qələbəylə ayrılan Bayramov qızıl, Qadjiyev isə gümüş medal qazanıb.
86 kq
Abubakr Abakarov ilk görüşdə monqolustanlı Bat Byambasuren üzərində inamlı qələbə qazanıb – 7:0. Abakarov 1/4 finalda qırğızıstanlı Nurtilek Karipbayevi 5:0 hesabıyla üstələyərək yarımfinala vəsiqə qazanıb. Abubakr qazaxıstanlı Azamat Dauletboku da (3:2) məyus edərək finala yüksəlib. Ancaq Abakarov zədələndiyi üçün Bəhreyni təmsil edən Maqomed Şaripovla həlledici görüşə çıxmayıb və gümüş medalla kifayətlənib.
Beləliklə, sərbəst güləşçilər yarışda 1 qızıl, 2 gümüş və 1 bürünc medal qazanıb.
Turnirdə 1-ci kateqoriyalı hakim Elman İsmayılov ədaləti qoruyub.
