"Qarabağ"ın yarımmüdafiəçisi Patrik Andrade HİK-lə oyunöncəsi Sports.az saytının suallarını cavablandırıb. 
Kabo-verdili ulduz keçmiş klubu "Partizan"ın "Sabah"la Belqraddakı qarşılaşması haqda fikir bildirmək istəməyib.

- Karyeran ərzində sənin üçün ən uğurlu klub kimi "Qarabağ"ı göstərmək olar. Hər halda statistika da bunu təsdiq edir. Bunun sirri nədədi?

- Razıyam. Klub hər cür şərait yaradır ki, yalnız futbolu düşünəsən. Bu da futbolçunun səviyyəsinin artmasına, yekunda meydandakı performansa təsir edir. Bununla oynadığım digər klublarda vəziyyətin pis olduğunu demək istəmirəm. Sadəcə, burda səviyyə daha yüksəkdi. 

- "Qarabağ"a dönüşündən sonra tədricən forma yığırsan. Azarkeşlər əvvəlki Patriki nə vaxt görəcək? 

- Tez bir zamanda ən yaxşı formamı yığmaq istəyirəm. Bunun üçün hər gün çalışıram. Ümumiyyətlə, yerində saymağımı xoşlamıram. Həmişə yaxşı idman formasında olmaq istəyirəm. İndi özümü hər gün daha yaxşı hiss edirəm. Ümid edirəm verdiyiniz suala tezliklə ehtiyac duyulmaz.

- Getdiyin dövrlə müqayisə Azərbaycan klublarında yaxşılığa doğru dəyiklik hiss edirsənmi? 

- Əslində, mən gedəndə də öz klubumuzda hər şey yaxşı idi. Dönəndən sonra görürəm ki, daha da yaxşılaşıb. 
Ümumi çempionatın səviyyəsinin isə artıdığı, komandaların gücləndiyini, heyətlərinə yaxşı futbolçular cəlb etdiyini deyə bilərəm.

- "Qarabağ"ı HİK-lə, keçmiş klubun "Sabah"ı isə keçmiş klubun "Partizan"la ağır oyunlar gözləyir. Bu qarşılaşmalar haqda fikirlərin maraqlıdı.

- Daha çox öz oyunumuz barədə danışmaq istərdim. Şübhəsiz, HİK-lə mücadilə bizim üçün çox önəmlidi. İndi bütün fikrimiz bu matça yönəlib. Çox motivasiyalıyıq. Tək mən yox, bütün komanda üzvləri belədi. Yalnız mərhələ keçməyə köklənmişik. Bunun üçün əlimizdən gələni edəcəyik.