Millidə labüd görünən nəsil dəyişikliyi olmasa...

İsveçlə oyunda ümid verən milli Slovakiyada bərbad çıxış etdi.

Üç gün öncə komandanın ən yaxşı futbolçusu olan Emin Mahmudov bu dəfə 1 dəqiqə də oynamadı. Əvəzində İsveçlə matçda 1 metrdən düz ötürmə edə bilməyən Aleksey İsayev yenə əsas heyətdə idi. Həmin oyunda yaxşı təsir bağışlayan Abbas Hüseynovun yerinə isə Slovakiyadakı matçın antiqəhramanı Amin Seydiyevə güvənildi. 

Sanki Santuş bizim futbolçuları hələ tam tanımır. Onun məşqçi komandası da slovakları yaxşı təhlil etməmişdi. 

Santuşun qarşısına hansısa məqsəd qoyulubmu, yoxsa De Byazi kimi elə-belə gətiriblər ki, Xəzərin nərəsindən, qara kürüsündən yeyib gününü keçirtsin, bilmirəm. 

Əgər məqsəd qoyublarsa, heyətin gəncləşdirilməsi haqda da yəqin ki, tapşırıq veriblər.
Dünənki, ruhsuz komandadansa U 21, U 19, U 17-nin üzvlərini cəlb edib Millətlər Liqasının əhəmiyyətsiz oyunlarında onları oynatmaq olardı.

Yəni, Santuş milliyə yalnız pul qazanmaq yox, həm də nələrsə qazandırmaq üçün gəlibsə, bu dəqiqə ən yaxşı qazancımız, gənclərin yeniyetmələrin ortaya çıxarılmasıdı. 

İsveçlə oyundan sonra da yazmışdım 20-25 yaşında millinin əsas heyətini təşkil edəcək yetərincə istedadlı gənclər var: 
Rza Cəfərov, Yusif İmanov, Nəriman Axundzadə, Emil Səfərov, Xəyal Əliyev, Fərid Yusifli və s. Bəlkə də hansısa milli formada meydana çıxsa 1-2 oyun həyacandan dizləri əsəcək. Amma onlara belə əhəmiyyətsiz görüşlərdə şans vermək lazımdı ki, bir az təcrübə yığsınlar və artıq əhəmiyyətli qarşılaşmalarda komandaya kömək edə bilsinlər. 
Bu gənclərlə oynayıb uduzsaq da, düşünürəm ki, azarkeşlər də, hamı da anlayışla qarşılayacaq. 

Millidə nəsil dəyişikliyi vacibdi! Bunu Santuşa anlatmaq lazımdı. Əks təqdirdə, dünənki kimi oyunların sayı çox olacaq... Milli komandada pul, mükafat üçün oynayan futbolçulara ehtiyac yoxdu. Formanın haqqını verən, özündən daha güclü rəqiblə döyüşən, ustalıq çatışmamazlığını bu döyüşkənliklə kompensasiya edən, xarakterli, milli ruhlu gənclərə yol açılmalıdı!