Amin!
UEFA-nın rəsmi saytında Çempionlar Liqasının əsas mərhələsi üçün "Qarabağ"ın iştirak ərizəsində 10 Azərbaycan pasportu olan futbolçu var:
1. Amin Rzayev - 12.10.2009
2. Hikmət Cəbrayılzadə - 02.08.2007
3. Nəriman Axundzadə - 23.04.2004
4. Musa Qurbanlı - 13.04.2002
5. Toral Bayramov - 23.02.2001
6. Elvin Cəfərquliyev - 26.10.2000
7. Bəhlul Mustafazadə - 27.02.1997
8. Abbas Hüseynov - 13.06.1995
9. Şahruddin Məhəmmədəliyev - 12.06.1994
10. Bədavi Hüseynov - 11.07.1991
Təsəvvür edin ki, Şahruddin - Elvin, Bəhlul, Bədavi, Abbas, Amin, Hikmət, Toral, Nəriman, Musa hamısı birlikdə hansısa oyunda start heyətində meydana çıxır!
Çempionlar Liqasının əsas mərhələsində birdən-birə 10 azərbaycanlı futbolçu və onların arasında 15 yaşlı Amin Rzayev!!!
"Qarabağ"ı hamı güclü forvard almamağa görə tənqid edir. Reallıq hissini itirməsək, rəqibləri nəzərə alsaq, yeni hücumçu gəlsə də, gəlməsə də uzağı hansısa mikrouğur qazanmaq mümkün görünür. Düzdü, bəxt üzümüzə gülsə, ÇL-dəki oyunlarda əldə ediləcək xallar, möcüzə yaşansa, avrokuboklarda növbəti mərhələyə vəsiqə forvarda çəkilən xərci artıqlaması ilə qarşılaya bilər.
Bir məqamı da unutmayaq ki, "Qarabağ" illərdir Avropada Azərbaycan futbolunun başını ucaldır. Klub rəhbərliyi sözsüz ki, bu cür turnirdə yaxşı çıxışı çox istəyir, amma nə etdiyini də hamıdan daha yaxşı bilir.
Bəlkə ÇL-in dünya futbolunun ən baxımlı turniri, vitrini olduğunu nəzərə alıb ilk növbədə indiki heyətdəki futbolçuları oynadıb özlərini yaxşı tərəfdən göstərmələrinə şans yaratmağı, bundan sonra onları satıb qazanc əldə etməyi və yeni, daha qlobal plan qurmağı düşünürlər?
"Qarabağ" rəhbərliyi son 15 ildə akademiyaya xüsusi diqqət ayırsaydı yetirmələri qitə turnirlərində özünü göstərə və klub bundan yaxşı qazanc əldə edə bilərdi. Keçənə güzəşt. Heç olmamaqdan, gec olması yaxşıdı. Nail Kərimov və Aftandil Hacıyevin gəlişindən sonra klubun uşaq akademiyasında nəzərəçarpacaq irəliləyiş var. Aminlər də təsadüfən belə yerlərə yüksəlmir.
Bu mövsüm yalnız Çempionlar Liqasında yox, UEFA Gənclər Liqasında da "Qarabağ"ın yerli futbolçularının bacarığını görmək şansımız olacaq. Gənclər Liqasında "Sabah"ı da izləyə biləcəyik.
Qoy 15 yaşlı Amin Rzayev və bütün fubolçularımız üçün avrokubok mövsümü uğurlu alınsın!
Amin!
