“Rəqibin qələbəsinə kölgə salmaq istəmirəm” - Füzuli Məmmədov
"Karvan-Yevlax" Misli Premyer Liqasının 19-cu turu çərçivəsində "Turan Tovuz"a 0:1 hesabı ilə məğlub olub.
Sports.az xəbər verir ki, "Karvan Yevlax"ın baş məşqçisi Füzuli Məmmədov matçdan sonra keçirilən mətbuat konfransında oyun barədə fikirlərini bölüşüb.
Mütəxəssis rəqibi yaxşı analiz etdiklərini və futbolçularının mübarizəsindən razı qaldığını bildirib. O, komandanın müdafiədə boşluqları azaltdığını, lakin uğur qazanmaq üçün qələbələrin vacib olduğunu vurğulayıb:
"Turan Tovuz" çox yaxşı komandadır. Rəqibi əvvəlcədən təhlil etmişdik, necə hücum qurduqlarını, necə müdafiə olunduqlarını bilirdik. Futbolçularım meydanda yaxşı mübarizə apardılar, maksimum güclərini ortaya qoydular. Hər birinə təşəkkür edirəm.
Belə oyunla uğur qazanmaq olar, amma bir az da üstünə qoymalıyıq. Qarşıdakı matçlarda daha effektiv çıxış etmək üçün çalışacağıq".
F.Məmmədov hakimliklə bağlı iradını bildirərək mübahisəli epizoda diqqət çəkib, lakin bunun rəqibin qələbəsinə kölgə salmasını istəmədiyini qeyd edib:
"Bir epizodda bizim müdafiəçimizə açıq ayaqla zərbə oldu. Həmin məqamı daha diqqətlə izləmək olardı. Ola bilsin, hakimlər bunu başqa cür dəyərləndiriblər. Amma "Turan Tovuz"un qələbəsinə kölgə salmaq istəmirəm. Onları təbrik edirəm".
Baş məşqçi Araz Abdullayevin matçda iştirak etməməsinin səbəbini də açıqlayıb:
"Ayağında zədə var. Ona görə də risk etmədik".
