Bizim "Şah"

Şahruddin Məhəmmədəliyev zəif məktəbi olan qapıçı idi. U 21-in heyətində buraxdığı biabırçı qollar yadımdadı. Səhv etmirəmsə, Avstriya ilə oyun idi, az qala mərkəzdən bizi məyus etdilər. Bəlkə də, Şahruddinin boyu balacaydı deyə belə qollar buraxırdı.
Amma Qurban Qurbanovun davamlı güvəni sayəsində Şahruddin ölkənin 1 nömrəli qapıçısına çevrildi.
Məktəb problemi "Qarabağ"da da zaman-zaman özünü biruzə verirdi və sonda "Şah" Türkiyəyə yollandı. Həftəsonu o yeni komandasında bir oyun keçirib, 3 qol buraxıb. Hamı yenə başlayıb Şahruddini tənqid etməyə.
"Adanademirspor"un oyununa baxanlar millimizin qapıçısının heç bir qolda səhvi olmadığını deyir. Komanda, xüsusən müdafiə çox bərbad oynayıb və Şahruddin də biri penaltidən olmaqla 3 qol buraxıb. Amma Məhəmmədəliyevin qurtarışları, seyvləri "unudulub".
Şahruddin bu gün milli komandamızın bəlkə də, ən xarakterli üzvüdü.  Belə keyfiiyyətə malik futbolçularımız çox azdı. Şahruddin Azərbaycanda doğulmasa da, ölkəmizlə onu bağlayan heç bir bağ olmasa da, millimizin formasına gərəkən dəyəri verən bir idmançıdı. Biz də belələrinin dəyərini bilməli, haqq etdikləri qiyməti verməliyik.
Şahruddinə güvənilsə, əminəm, o Türkiyə Super Liqasının ən yaxşı qapıçılarından olacaq. Biz də media, futbol ictimaiyyəti olaraq bu yolda ona bacardıqca dəstək verək, badalaq vurmayaq!