Ümid edirəm AFFA-nın yeni rəhbərliyinin ümdə vəzifəsi əvvəlkilər kimi dövlətin və beynəlxalq qurumların ayırdığı vəsaiti mənimsəmək olmayacaq. Sonra da "Bizdə heç vaxt istedadlı futbolçu çıxmayıb" tipli bəhanələr gətirməyəcəklər. 

Bu gün "Zirə" Araz Abdullayevlə müqavilə bağlayıb. Araz keçmiş AFFA rəhbərliyinin yeyintilərinə bəraət qazandırmaq üçün ortaya atdığı "Azərbaycanda istedadlı futbolçu yoxdu" fikrini darmadağın edən isimlərdəndi.

Hər halda, İngiltərə Premyer Liqası təmsilçisi elə-belə futbolçu götürməz. Arazın "Everton" karyerasının alınmamasının, ümumiyyətlə, istedadına uyğun futbolçu olmamasının əsas günahkarı da AFFA-dı.
"Qarabağ"dan örnək götürün, öyrənin! Heç kimin tanımadığı futbolçuları gətirib inkişaf etdirirlər, bir mövsüm ərzində qiymətini dəfələrlə artırırlar.

AFFA-ya ayrılan pul "Qarabağ"a verilsə, indi komanda bəlkə də avrokubok qazanmış, normal akademiya qurmuş, qitədə ən hörmətli klub modellərindən birini yaratmışdı. Amma kiçik büdcəylə də fantastik iş görməyi bacardılar. 

Maraqlıdı, niyə Qurban Qurbanovdan başqa "Qarabağ"dan heç kim AFFA-nın yeni tərkibində yoxdu? Tahir Gözəl, Emrah Çelikel, Asif Əsgərov hardadı? AFFA-nın yeni rəhbərliyində niyə təmsil olunmayacaqlar? Futbol tariximizdə onlardan daha çox uğur qazanan varmı? 

Orxan Məmmədovun sayəsində minifutbol millimiz  Avropa çempionu oldu. Milli komandalar səviyyəsində bundan böyük nailiyyət qazanmışıqmı? O hardadı?

Ehtiram Quliyev kimi vizyonlu, futbolumuzun inkişafı üçün fədakarlıq edən, doğru iş görən bir dəyər niyə AFFA-nın yeni rəhbərliyində təmsil olunmur?

Fariz Nəcəfov tək futbolumuzun yox, ölkəmizin dəyəridi. "Qəbələ" indiyəcən futbolumuzun inkişafı üçün ən böyük iş görmüş, doğru yol tutmuş yeganə klubdu. 

Qurban Qurbanov və Balakişi Qasımovdan savayı AFFA-nın yeni rəhbərliyində təmsil olunacaq şəxslərin əvvəlkilərdən hansı ciddi fərqi var?

Futbolumuzu ən azı yarım əsr geri salan keçmiş AFFA rəhbərliyindən sonra gələcək adamlara çox böyük ümid vardı. Amma adlara baxanda bu işin də sonunun yaxşı olmayacağı kimi görüntü yaranır... 

İnşallah, ilk təssürat səhv çıxar. UEFA-ya SOCAR-ın milyardlarını verib sonra "Elxan Məmmədov futbolumuzun inkişafı üçün "Avropa Çempionatının final mərhələsinin 4 oyununu, Avropa Liqasının finalını Bakıya gətirdi" tipli nağıllar danışmaqla zavallı xalqı aldatmazlar. 

Belə inkişafa...