Dumandan özünə xeymə qurmuş "Qəbələ"
"Qəbələ" Azərbaycan futbol tarixində xüsusi iz qoymuş, bəzi ilklərə imza atmış klubdur.
Komanda 2015/2016 mövsümündə Avropa liqasında “Dinamo” (Tiflis, Gürcüstan), “Çukariçki” (Serbiya), “Apollon” (Kipr) və “Panatinaikos”u (Yunanıstan) mübarizədən kənarlaşdıraraq avrokuboklarda ardıcıl 4 mərhələ adlamış ilk təmsilçimiz kimi tarixə düşüb.
Bir mövsüm sonra yenidən eyni uğuru təkrarlayıb. Bu dəfə "Samtredia" (Gürcüstan), MTK Budapeşt (Macarıstan), "Lill" (Fransa) və "Maribor" (Sloveniya) keçilib.
"Qəbələ" iki dəfə avrokuboklarda qrupa düşüb və bu göstəricidə ölkəmizdə yalnız "Qarabağ"dan geri qalır.
Amma bütün bunlardan daha vacibi 2009-cu ildə Azərbaycanda açılmış ilk futbol akademiyasıdı. Burda əsas komandanın oynadığı stadion daxil 6 təbii örtüklü tamölçülü, bir üstüörtülü, 3-ü tam ölçülü olmaqa 6 süni örtüklü və 1 qum meydançası var.
Bu cür dünya standartlarına cavab verən şərait Azərbaycanda hələlik heç bir akademiyada, nəinki akademiya heç bir peşəkar klubda yoxdur.
Təəssüf ki, indi "Qəbələ" klubu çətin dövrlərini yaşayır.
Yaxın keçmişdə Tale Heydərovun rəhbərliyi ilə Fariz Nəcəfov, Zaur Əzizov Səbuhi Səfiyarlı, Səməd Nəsibov, Nail Kərimov, Səbuhi Qarayev, Anar Hacıyev, bir çox başqa gənc və peşəkar kadrların böyük əməyi ilə klub həm ölkədə, həm də Avropada özündən söz etdirməyi bacardı. Təkcə, "Böyük beşlik" ölkəsi Fransanın təmsilçisi "Lill" kimi ad-sanlı klubu qitə turnirində mübarizədən kənarlaşdırmaq nəyə desən dəyərdi.
Möhtəşəm təbiəti, əsrarəngiz mənzərələri ilə hamını valeh edən Qəbələdəki dağlar qədər vüqarlı klubun gələcəyi təəssüf ki, son illər dumana bürünüb.
Ötən mövsüm avrokuboklara vəsiqə həm böyük uğur, həm də klubun yaşaması üçün ciddi dəstək oldu.
Vaxtilə Qəbələdə futbol akademiyası da yetərincə məhsuldar fəaliyyət göstərirdi. Başqa rayonlardan, kəndlərdən istedadlı uşaqlar seçilirdi, onlar peşəkar inkişafları üçün hər bir şəraitin yaradıldığı akademiyanın bazasında qalırdı. Burda çox sayda istedadlı gənc futnolçular yetişdi. İllərdir əsas milli daxil bütün milli və klub komandalarımızda bu akademiyanın yetirmələrinə rast gələ bilirik.
Təəssüf ki, maliyyə çətinliyi ucbatından artıq "Qəbələ" Futbol Akademiyası da əvvəlki gücü ilə fəaliyyət göstərə bilmir.
Maliyyə imkanlarının pisləşməsi ilə kluba medianın da diqqəti azalıb. "Fehervar"la Konfrans Liqasının cavab oyununa yollandığımız miniavtobusda cəmi 3-4 nəfər jurnalist vardı. Amma kluba hər zaman qayğıyla yanaşan Tale Heydərov həmişəki kimi çətin gündə də Qəbələyə təşrif buyurmuşdu.
Doğrudur, jurnalistlərin laqeyd münasibətinin səbəblərindən biri həm də o idi ki, həmin gün "Neftçi" Bakıda "Aris"lə qarşılaşacaqdı və ilk oyunlardan sonra "flaqman"dan fərqli "Qəbələ"nin mərhələ keçmək ümidi möcüzələrə qalmışdı.
Qəbələlilər möcüzəni gerçəkləşdirə bilməlidilər, amma məhdud imkanlarla ən azı qalib gəlib ölkəmizə reytinq xallarını qazandırmağı bacardılar. "Qəbələ"nin ehtiyat oyunçular skamyasında meydana daxil olacaq cəmi 1 az çox təcrübəli futbolçu vardı... Oyundan sonra baş məşqçi Elmar Baxşıyev də bu məqamı xüsusi vurğuladı.
Bölgə və uşaq futbolunun inkişafı lazımdırsa, ölkədə başqa heç bir yerdə olmayan infrastruktura malik Qəbələdə futbol akademiyasının tam gücü ilə fəaliyyəti təmin edilməlidir. Akademiyadakı uşaqların baxıb örnək götürməsi üçün isə mütləq "Qəbələ"nin əsas komandası daha sanballı durumda olmalıdır.
Ümid edək ki, AFFA və AGİN rəhbərliyindəki dəyişiklər bu klub və akademiya üçün də faydalı olacaq.
