Ucuz ətin şorbası
Əvvəldən bəlli idi ki, bu qrupda autsayderik. Fransa ilə ilk oyundan öncə "Oser faciəsi"nə bənzər növbəti rüsvayçılıqdan qorxurduq.
İndi sanki reallıq hissini itiririk. Bəli, fransalı ulduzların Bakıda ciddi motivasiyası yox idi. Amma qalan matçlarda rəqiblər millimizlə 3 xal uğrunda var-gücü ilə mübarizə apardı.
Bunu hamı bilir ki, uşaq futbolu üçün infrastruktur, təbii ot örtüklü meydançalar, akademiyalar yaradılmasa, xaricdən səviyyəli mütəxəssislər gətirilməsə, onların yanında özümüzünkülər yetişməsə belə də davam edəcək. Uşaq futbolu düzəlməsə, mümkünsüzdür!
Milli ilə də bağlı fundamental işlər görülməli, doğru təməl qoyulmalıdı. Ayxan Abbasovun gəlişi ilk uğurlu addım sayıla bilər.
Komandamız 16 oyundur qələbə qazana bilmir. Son 2 ildə keçirdiyimiz 20 matçda 2 qalibiyyət var. O da ucuz əti ilə daha çox gündəmdə olan Monqolustan və Qazaxıstanla yoldaşlıq görüşlərində. Amma ucuz ətin şorbası olmadığı kimi Monqolustanla oyunda qələbədən də fatıya tuman olmadı.
Əsas qazancımız bəzi gənc futbolçuların milliyə dəvət almasıdı. 21 yaşlı Xəyal Əliyev, Nəriman Axundzadə kimi futbolçular hələ uzun illər millinin aparıcı simaları ola bilərlər. 20 yaşlı Rüfət Abbasovun işi bir az çətindi. Çünki, Elvin Cəfərquliyevlə eyni mövqedə oynayır. Amma Toral Bayramov və Rəhman Daşdəmirovu da nəzərə alsaq, ən azı sol cinah müdafiəçisi mövqeyində rəqabətin olmasına sevinə bilərik.
Təəssüf ki, hər mövqe haqda eyni sözləri demək olmur. Məşqçilərin oyunçu seçimi baxımından işi çox çətindi. İndi əsas yük də seleksiyaya məsul şəxslərin üzərinə düşəcək. Millətlər Liqasının D qrupunda zəif rəqiblərlə oyunlaracan mümkün qədər gənc heyət formalaşdırılmalıdı.
Ayxan Abbasov həmin komandanı yaradıb uğurlar qazanacaq potensialda baş məşqçidi. Uğursuz əcnəbilərə illərlə şans verilən əsas millidə cəmi 2 ay əvvəl işə başlasa da, indi kollektivinin Fransayla mübarizə aparıb məğlub olmasına görə tənqid hədəfidirsə, doğru yoldadı!
