Azərbaycanlı pilot Portimao trekində debüt etdi

Kartinqdə bir çox beynəlxalq uğurlara imza atmış perspektivli yeniyetmə azərbaycanlı pilot Davin Cəfərovun karyera yüksəlişi davam edir. 

Sports.az xəbər verir ki, kartinqdə uğurlu çıxışı ilə diqqət mərkəzinə düşən Davin “Formula Winter Series” yarışına dəvət alıb.

Yeniyetmə pilot sponsorluqla bağlı məsələlər həll edilmədiyindən çempionatda iştirakdan kənarda qalsa da, Formula 4 test sessiyasına dəvət alaraq Formula 4 avtomobili ilə ilk rəsmi təcrübəsini yaşayıb. 

Test sessiyaları Portuqaliyada yerləşən və Portimao treki kimi tanınan “Autodromo Internacional do Algarve”də baş tutub. Bu trek dünyanın ən çətin və ən müasir yarış treklərindən biri hesab olunur. Yüksəklik dəyişiklikləri, 15 texniki döngəsi və yüksək sürət tələb edən quruluşu ilə seçilən bu trek FIA Grade 1 və FIM Grade A statusuna malikdir və Formula 1, eləcə də MotoGP kimi ən nüfuzlu yarışlara ev sahibliyi edir. Qeyd edək ki, Formula 1 rəsmi olaraq 2027 və 2028 mövsümlərində Portimao trekınə qayıdacaq.

Sessiyalar tam yağışlı hava şəraitində baş tutdu ki, bu da debüt edən sürücü üçün əlavə çətinliklər yaradırdı. Gün ərzində baş verən 7 qəza sessiyanın nə qədər mürəkkəb və riskli şəraitdə keçdiyini açıq şəkildə göstərdi. Testlərdə McLaren, Red Bull və Van Amersfoort Racing kimi dünya səviyyəli komandaların “junior pilot” proqramlarına daxil olan sürücülər iştirak etdi ki, bu da öz növbəsində rəqabət mühitinin yüksək səviyyədə olduğunun göstəricisi sayıla bilər.

Formula 4-də ilk dəfə sükan arxasına keçən sürücülər üçün avtomobilin söndürülməsi (stall) və xüsusilə ikinci sessiyalardan sonra qəzaların baş verməsi adətən normal hal hesab olunur. Lakin bu ümumi mənzərənin fonunda Davin Cəfərov ilk Formula 4 test gününü qəzasız başa vurmağı bacardı. 

Xüsusilə yaş trek şəraitində nümayiş etdirdiyi avtomobilə nəzarət, soyuqqanlılıq və texniki dəqiqlik komanda rəhbərliyi, mühəndislər və müşahidəçilər tərəfindən xüsusi olaraq qeyd olundu. Normal quru şəraitdə Portimao trekində Formula 4 avtomobillərinin maksimal sürəti 235–242 km/saat, yaş trekda isə adətən 195–210 km/saat aralığında olur. Buna baxmayaraq, Davin Cəfərov yağışlı şəraitdə 224 km/saat maksimal sürətə çataraq yol tutuşunun (grip) idarə edilməsində yüksək səviyyəli bacarıq və özünə inam nümayiş etdirdi.

Təəssüf ki, göstərdiyi bu güclü performansa baxmayaraq, həll olunmamış sponsorluq məsələləri səbəbindən Davin Cəfərov hazırkı mərhələdə yarışlarda iştirak edə bilməyəcək.

Buna baxmayaraq Davin maliyyə məsələləri həllini tapandan sonra Formula 4-də gözləntiləri üstələyəcəyinə, ardınca Formula 3, Formula 2 və avtomobil idmanının ən yüksək zirvəsi olan Formula 1-ə doğru ardıcıl və möhkəm yol qət edəcəyinə inanır. Gənc pilotun əsas məqsədi bu yolda Azərbaycanı beynəlxalq avtomobil idmanında layiqincə və qürurla təmsil etməkdir.