“Barselona”nın sabiq müdafiəçisi Jerar Pike Kataloniya klubunun hazırkı vəziyyəti ilə bağlı fikirlərini paylaşıb və həmçinin kataloniyalıların hazırkı baş məşqçisi Xavini komandaya ən uyğun məşqçi hesab etdiyini bildirib.

Sports.az Pikenin bu barədə fikirlərini təqdim edir:

“Barselona”nın göstərdiyi oyun səviyyəsi belə bir klubdan gözlədiyiniz səviyyədə deyil. “Barselona” üçün tələblər mümkün qədər yüksəkdir. Komandanın nəticələri o qədər də pis olmasa da, oyunundan alınan hisslər heç də yaxşı deyil.

Bununla belə, mən Xaviyə yüz faiz güvənirəm. Onun yerinə kimi axtaracaqsınız? O, evindədir, kluba nə lazımdır, paltardəyişmə otağında nə deməyə dəyər, bilir. O, onların içində olduqları vəziyyətə tam nəzarət edir və onu necə dəyişdirəcəyini bilir. Sadəcə ona güvənməliyik”.