Mərakeş Futbol Federasiyası qalmaqallı finalla bağlı məhkəməyə şikayət edəcək
Kral Mərakeş Futbol Federasiyası (FRMF) Afrika Millətlər Kubokunun finalında hakimin qərarları və Seneqal komandasının meydanı tərk etməsi ilə bağlı yaşananlara görə rəsmi bəyanat yayıb.
Sports.az xəbər verir ki, FRMF baş verənlərlə bağlı apellyasiya müraciəti ediləcəyini açıqlayıb, eyni zamanda milli komandaya göstərilən dəstəyə görə azarkeşlərə minnətdarlığını bildirib.
Qeyd edək ki, ötən gün keçirilən final görüşünün əsas vaxtı qolsuz başa çatıb.
Oyunun sonlarında Mərakeşin xeyrinə təyin edilən penaltidən sonra Seneqal futbolçuları etiraz əlaməti olaraq meydanı tərk ediblər. Federasiya bu halın oyuna və Mərakeş oyunçularının psixoloji durumuna təsir etdiyini bildirib.
Penalti zərbəsini Braim Dias yerinə yetirsə də, rəqib qapıçı Eduard Mendi topu tutub. Əlavə vaxtda Seneqal həlledici qolu vuraraq kuboku qazanıb.
