“Barselona”nın sabiq futbolçusu Nərimanla komanda yoldaşı oldu
Nəriman Axundzadəni transfer edən ABŞ-ın “Kolumbus Kru” klubu heyətini tanınmış yarımmüdafiəçi ilə gücləndirib.
Sports.az xəbər verir ki, MLS təmsilçisi Portuqaliya millisinin sabiq üzvü Andre Qomesin keçidini rəsmiləşdirib.
Azad agent statusu ilə komandaya qoşulan 32 yaşlı futbolçu ilə 2027-ci ilin iyununa qədər olan müqavilə imzalanıb. Sözləşmədə müddətin daha bir il uzadıla biləcəyi barədə bənd də yer alıb.
Karyerası ərzində Portuqaliyanın “Benfika”, İspaniyanın “Valensiya”, “Barselona”, İngiltərənin “Everton” və Fransanın “Lill” klublarında çıxış edən Qomes bir çox uğura imza atıb. O, “Barselona” ilə İspaniya çempionu (2017/18) olub, iki dəfə Kral kubokunu və bir dəfə ölkə superkubokunu qazanıb.
Portuqaliya yığmasının heyətində 29 oyun keçirən Qomeş 2016-cı ildə Avropa çempionu tituluna sahib çıxıb.
Nəriman Axundzadənin “Kolumbus Kru” ilə sözləşməsinin müddəti 2029-cu ilin yayınadək nəzərdə tutulub.
