"Neftçi" Çingiz Abdullayev yazdığı kimi oynasa...
"Neftçi" bu axşam Vyanada UEFA Konfrans Liqasının pley-offuna yüksəlmək uğrunda çox ağır mücadiləyə çıxacaq. Klubun Müşahidə Şurasının sədri yazıçı Çingiz Abdullayevdir.
Çingiz Abdullayev necə əsər yazırsa, komandamız da o cür oynasa, demək, "Neftçi"dən Vyanada uğur gözləməyə dəyməz, əsas bundan narahatam.
Komandamız evdə 2:1 hesabı ilə qalib gəlib və məqsədinə çatmaq üçün bu üstünlüyü qorumağı kifayətdir. Amma rəqib çox güclüdür. Adı gələndə adam bir az vahimələnir. "Rapid" təkcə Avstriyanın yox, Avropanın ən köklü klublarındandır. Özü də 6 ildir avrokuboklarda bu mərhələdə evdə məğlub olmur. Bukmekerlər də "Neftçi"nin Bakıda qalib gəlməsinə baxmayaraq, mərhələ keçəcəyinə inanmır. Amma onlar heç Bakıdakı oyunda da "Neftçi"nin nəinki qələbəsinə, heç-heçəsinə də inanmırdılar.
Məncə, futbolumuzun flaqmanı Bakıda göstərdiyi oyunun 50 faizini Avstriyada göstərə bilsə, mərhələ keçəcək. Həm də, nəzərə alaq ki, "ağ-qaralar" rumıniyalı baş məşqçinin gəlişindən sonra oyundan oyuna artırır və daha güclü futbol ortaya qoyur. Bu templə davam etsə, axşam "Neftçi"dən Bakıdakından da yaxşı oyun gözləyə bilərik. Və əgər bu baş versə, o zaman mərhələ keçəcəyimiz şübhə doğura bilməz.
Dünən Sports.az-da oxudum ki, Rumıniyanın güclü klublarından birinin prezidenti Regekampfı ölkəsinin ən yaxşı məşqçisi adlandırıb. Düzü, biz onun gəlişindən sonra "Neftçi"nin oyunundakı müsbət dəyişikliyi görürük və bu fikrin əsassız olmadığına inam yaranır.
"Rapid" Avropanın ən köklü klublarından olsa da, 6 il Avropadakı rəqiblərinə evdə məğlub olmasa da, onun Bakıda göstərdiyi futbol bu klubun adından qorxmaq üçün heç bir əsasın olmadığını göstərir. "Rapid"in Bakıdakı oyununa baxandan sonra rahatlıqla fikirləşmək olar ki, "Neftçi" evdə 2:1 yox, daha böyük hesablı qələbəyə layiq idi və buna nail ola bilərdi. Bütün hallarda mıa şükür, mıa da şükür! Davamını Avstriyada gözləyirəm.
Deyim ki, "Neftçi" "Rapid"ə uduzsa da, faciə olmayacaq. Çünki 6 il bu mərhələdə uduzmayan komandanın seriyasını qırmaq anlaşılan o qədər də asan məsələ deyil. Əlbəttə, Regenin komandası böyük təzyiq qarşısında davam gətirsə, möhtəşəm olacaq.
