UEFA “Neftçi” böyüklüyünü unutmadı
UEFA Konfrans Liqasının paylaşımı...
İllərdi klubu dağıdanlar unutdu, UEFA "Neftçi" böyüklüyünü unutmadı...
Klub/komanda quruculuğu, qələbə ruhu, təcrübəli, səviyyəli yerli, legioner futbolçular öz yerində, "San Siro"da "İnter"ə qarşı meydana 19-22 yaşlı futbolçular çıxırdı...
Heç kimə "gəncləri oynadırıq" deyilmirdi, çəkinmədən əsas heyətdə cavanlar, istedadlar oynadılaraq nəticələr qazanılırdı...
Tərlan Quliyev, hazırda hansı klubda olduğu bilinməyən Emin Mehdiyev, 18-19-20 yaşlı Elvin Yunuszadə, Mirhüseyn Seyidov, Emil Balayev, Elşən Abdullayev, Məqsəd İsayev, gənc olmaqlarına baxmayaraq artıq təcrübəli, 22 yaşlı Araz Abdullayev, Cavid İmamverdiyev... Və davamı gələn, yetişən neçə-neçə yeniyetmə-gənc futbolçular...
Vaxtilə düşmən pünikləri Moskvadan qovan, davamını Nikosiyada gətirən, nəhəng Milan stadionunda nəhənglərdən çəkinməyən, üstlərinə gedən "Neftçi"!
Dağıdıcı zərbə tək tarixi kluba, Azərbaycan futboluna dəyməyib, istedadlı gənclərin qarşısı alınıb, didərgin salınıb, inkişafları dayanıb. Bu illər ərzində 100-dən çox transfer edilib, səviyyəsiz futbolçular gətirilib komandaya.
İllərlə əməyi keçənlərin əziyyəti, fədakarlığı sayəsində "Neftçi"nin 5-10 il ardıcıl uğurlar qazanmağa, liderlik etməyə heyəti formalaşmışdı...
Dağıtmaq asandır, qurub-yaratmaq çətin!
Yaxınlarda, o vaxt gənc, indi artıq təcrübəli futbolçularımızdan birinin dediyi kimi,
"Çox gənc idik, dərk etmirdik, o günlərin, bizim üçün hansı əziyyətlərin çəkildiyini bilmədik. Sonralar, böyüyə-böyüyə, haqsızlıqlarla üzləşə-üzləşə dərk etdik"...
Qarşıda "Neftçi"ni "İnter" Milan, heç həmyerliləri APOEL də gözləmir, sıradan bir "Aris"dir...
İstənilən dövrdə uğursuzluq yaşana bilir, klub/komanda möhkəmdirsə, böyüklük dərk edilirsə, dərhal geridönüş etməyi bacarır...
"Neftçi"ni kiprlilərlə cavab matçına kökləməyə ehtiyac yoxdur, oyuna kimi hər gün bu fotolara baxılsın. UEFA zərgər dəqiqliyi ilə pasını, ötürməsini edib, videoları da əlavə edib, rəhbərlik, məşqçilər, futbolçular bir yerdə seyr etsinlər...
Bundan böyük psixoloji "ustanovka" olmur!
UEFA-nın paylaşımı, 10 il öncəni xatırlatması rəmzi məna daşıyır. Beynəlxalq quruma da keçirdiyi turnirlərdə böyük klubların, dolu tribunaların, ictimai marağın, geniş diqqətin, müzakirələrin olması sərf edir...
UEFA da deyir, "Neftçi" - böyüksən!
Olmasa... "Neftçi" - kiçik düşünənlərin yeri deyil...
Uğurlar olsun!
