Asiya çempionu "Sabah"da!
Qış transfer dönəmində Qazaxıstan yığmasının qapıçısı Stas Pokatilovu heyətinə qatan "Sabah" daha bir asiyalı futbolçu ilə güclənir.
Söhbət özbəkistanlı Umarali Raxmonaliyevdən gedir.
Onun kapitanı olduğu Özbəkistan millisi inişil Asiya U20 çempionatının qalib adını qazanıb, Umarali isə final matçında İraqın qapısına yeganə qolu vurub.
"Sabah" 21 yaşlı yarımmüdafiəçini məxsus olduğu Kazan "Rubin"indən 1 illik icarəyə götürüb.
Verilən məlumata görə, Masazır klubu futbolçunun transferi üçün 200 min avrodan keçməyə hazır imiş. Amma Tatarstan təmsilçisi bu təklifdən imtina edib. Futbolçu özünü Azərbaycanda yaxşı göstərə bilsə, "Sabah" bir il sonra 360 min avro ödəməklə onu transfer edə bilər.
Qeyd edək ki, Umarali Raxmonaliyevin "Rubin"lə müqaviləsi gələn ilin yayı bitir. "Sabah" özbəkistanlı gənc futbolçunu transfer etsə, onun növbəti satış məbləğinin 25 faizini Kazan klubuna ödəməli olacaq.
