Olimpiya komandamız üçün qala gecə təşkil olunub

Fransanın paytaxtı Parisdə baş tutmuş XXXIII Yay Olimpiya Oyunlarında ölkəmizi uğurla təmsil etmiş Olimpiya komandamızın şərəfinə qala gecə təşkil edilib.

Sports.az Gənclər və İdman Nazirliyinin mətbuat xidmətinə istinadən xəbər verir ki, Paris-2024-də iştirak etmiş Azərbaycan idman nümayəndə heyətinin üzvləri tədbirdə yer alıblar.

Qala gecədə Milli Olimpiya Komitəsinin vitse-prezidenti Çingiz Hüseynzadə və gənclər və idman naziri Fərid Qayıbov çıxış edərək idmançıları bir daha uğurlu çıxışları münasibətilə təbrik ediblər.

Sonra nazir Fərid Qayıbov XXXIII Paris Yay Olimpiya Oyunlarında qazanılmış yüksək nailiyyətlərə və Azərbaycan idmanının inkişafında xidmətlərinə görə Azərbaycan Prezidentinin Sərəncamı ilə təltif edilmiş olimpiyaçılarımızın məşqçilərinə dövlət mükafatlarını təqdim edib və onlara uğurlar arzulayıb.

Tədbir bədii proqramla davam edib.