Uğurlar, Şah!

Şahruddin Məhəmmədəliyevin bu gün "Adanademirspor"la müqaviləsinin rəsmən açıqlanacağı gözlənilir.
O, azarkeşlərin yaddaşında əsasən avrokuboklarda buraxdığı bəzi həlledici səhvlərlə qalacaq. Bəzi jurnalistlər isə soyuq başla bəlkə də Şahruddini tənqid edəndə dozanı bir qədər aşdıqlarını düşünəcəklər.
Ümumiyyətlə, qapıçı futbolda ən pis mövqedi. Onlar bəzən həyatları bahasına komandasını qoldan xilas edir. Belə faktlar çoxdu, sadalayıb qanınızı qaraltmaq istəmirəm. Amma azarkeşlərin yaddaşında daha çox buraxdıqları səhvlər qalır.
Şahruddinin də çox fədakarlıqlarını, həlledici qurtarışlarını, gözəl seyvlərini görmüşük. Döyüşkən xarakterinə görə sevilib, hər zaman  komandada liderlərdən olub.
İnsan kimi onun haqda mənfi rəy eşitməmişəm. Yaddaşlarda müsbət, hörmətəlayiq oğlan kimi qalacağını düşünürəm. Hərəkətləri, insanlığı ona qarşılıqlı hörmət, rəğbət yaradıb.
Türkiyə Super Liqası Azərbaycan Premyer Liqası ilə müqayisəolunmaz dərəcədə yüksək səviyyəli turnirdi. Şahruddin ölkəmizə gələndən bəlkə də ən çətin dövründə verdiyi qərarla irəli addım atdı.
Onun qardaş ölkədə özünün ən yaxşı keyfiyyətlərini göstərəcəyinə inanıram.
Şahruddin indi qapıçı üçün elə yaşdadı ki, Türkiyədə özünü doğruldub qitənin top çempionatlarından birinə gedə bilər.
Ona bu çətin yolda səmimi qəlbdən uğurlar arzulayıram!