Milli komandamızla Estoniya ilə səfər qarşılaşmasına ETOPAZ-ın dəstəyi ilə bir qrup idman jurnalisti də yollanmışdı. Yeri gəlmişkən, şirkətin rəhbəri, keçmiş həmkarımız Altay Əliyev də nümayəndə heyətində idi.
Ümumən gözəl səfər alındı. Millimiz tarixində ilk dəfə Avropa Çempionatlarının seçmə mərhələsində səfər qələbəsi qazandı, AFFA-nın baş katibi Sərxan Hacıyevi yaxından tanımaq imkanımız oldu, tipik Avropa şəhəri Tallini gördük, hətta, gəmi ilə Helsinkiyə getməyə imkan tapdıq. Hələ Estoniyanın fəxri vətəndaşlığını almış ilk türk, Estoniya prezidentinin şəxsi tərcüməçisi ilə tanışlığı demirəm...
...Tallinə yola düşən təyyarədə Rauf Əliyev, Elmar Məmmədyarov, İsgəndər Cavadov, Vaqif Sadıqov, Zaur Qəhrəmanov, Fərrux Mahmudov, İlqar Nadiri və başqa tanınmış simalar da vardı.  
Emin Mahmudov, Səlahət Ağayev və digər təcrübəli futbolçulardan fərqli millidə yeni-yeni görünən bəzi gənclərin özünü ictimaiyyət arasında apara bilməməsi üzücü fakt idi. Bu futbolçuların "Qarabağ"ı təmsil etməsi isə həm də təəccüb yaradırdı. Çünki, Qurban Qurbanovun olduğu yerdə də bu cür davranışlarına nəzarət edə bilməyəcəkləri inandırıcı görünmür...
Tariximizə ən güclü klublarda çıxış etmiş futbolçumuz kimi düşəcək Mahir Emreli, Musa Qurbanlı, millinin məşqçiləri Elxan Abdullayev və Kamran Ağayevin isə jurnalistlərimizə səmimi münasibəti nəzərdən qaçmadı. 
Səmimiyyətdən danışmışkən, AFFA baş katibinin də həmkarlarımıza diqqətini vurğulamalıyam. Tallində jurnalistlərlə görüşən Hacıyev suallarımızı kifayət qədər ətraflı cavablandırdı. Elxan Məmmədov heç vaxt belə səmimi deyildi...
Sərxan bəy futbolumuzun problemlərini və onların həll yolunu bilən bacarıqlı kadrdı. 
Millimiz zəif Estoniyanı uddu, oyunu hamı izləyib, ətraflı yazmağa lüzum görmürəm. 
Yalnız onu deyim ki, De Byazi qələbəni gözündə çox böyütmüşdü. Bu səbəbdən oyunsonrası mətbuat konfransında həmkarlarımın normal suallarını aqressiv qarşıladı və azerisport.com saytının baş redaktoru, təcrübəli jurnalist Vüqar Zeynalovdan layiq olduğu cavabı aldı. 
Aydın məsələdi ki, De Byazinin qatarı gedib, nəvələrlə oynamaq vaxtıdı.
Xalqın Azərbaycan millisinin baş məşqçisinə olan gözləntiləri ilə qoca italyanın fikirləri heç üst-üstə düşmür. Məsələn, mətbuat konfransında suallara qeyri-adekvat reaksiyalar verir. Avstriya və İsveçlə səfər qarşılaşmalarımızda olan yeganə azərbaycanlı jurnalist kimi bunu ilin əvvəlindən görmüşdüm. 
De Byazi yenə də futbolçularımızı ruhdan salacaq fikir bildirdi, Avstriya ilə ev oyunundan öncə "Rəqib bizdən güclüdü" dedi. İsveçlə oyunöncəsi də belə olmuşdu, nəticə bəllidi... 
"Rəqib bizdən güclüdü" deyib öz aləmində öncədən cəmiyyəti psixoloji cəhətdən məğlubiyyətə hazırlamaq taktikası qurmaq əvəzinə, yaşıl meydanda qələbə taktikasını qurmağı bacarsaydı...
Estoniya ilə oyun bitəndən sonra media sektorunun çıxışında bir həmyerlimiz yaxınlaşıb "Burda gədəbəyli jurnalist Anar Şabanoğlu olmalıdı" dedi. Həm özümü, həm də o an yanımda olan həmkarlarım Əlisahib Əliyev ilə İlkin Fikrətoğlunu təccübləndirən ağsaqqal Tartu şəhərindən gəldiyini və bizə qonaqlıq vermək istədiyini sözlərinə əlavə etdi. Sonradan bildim ki, bu fəxri Estoniya vətəndaşlığı alan ilk türk, Estoniya prezidentinin şəxsi tərcüməçisi, şair, tərcüməçi, publisist, ictimai xadim, professor, Dünya Azərbaycanlıları Konqresinin İdarə Heyətinin üzvü, sədr müavini, katibi, Estoniya-Azərbaycan cəmiyyətinin sədri, Tartu Universiteti Türk Dili Mərkəzi müdiri, Fin-Uqor dilləri üzrə ilk azərbaycanlı alim Xəqani Qayıblı imiş. 
Mənə bu xoş sürprizin ideya müəllifi və təşkilatçısı isə dəyərli şairimiz Ehtiram İlham olub.