Başqa yolu yox artıq!
Emosiyalar sakitləşsə də, "Qarabağ"ın Braqada nə qədər fantastik, miqyaslı bir iş gördüyünü sanki tam dərk etmirsən.
İstəyirsən bu qarşılaşma, möhtəşəm ölkəyə səfər haqda hər gün yazasan!
Oyundan öncə keçirilən mətbuat konfransında Julio Romao portuqalların heyətində Simon Banzanın ən təhlükəli futbolçu olduğunu demişdi.
Konqo Demokratik Respublikasının heyətində Afrika Millətlər Liqasında 3-cü yer uğrunda matça çıxmış forvard bu turnirdə iştirakına görə uzun fasilədən sonra klubunun heyətinə yeni qayıtmışdı. Romaonun proqnozu qismən doğruldu. Banza Lunyovun qapısına qol vurdu.
Banzanın və Abel Ruisin qiyməti təxminən "Qarabağ"ın illik büdcəsi qədərdi. "Braqa"nın kapitanı Rikardo Ortanın dəyəri isə "Qarabağ"ın illik büdcəsindən xeyli çoxdu.
Qurban Qurbanova sual verirəm ki, bu məqam, "Braqa"nın büdcəsinin "Qarabağ"dan təxminən 10 dəfə artıq olması futbolçularımıza psixoloji cəhətdən mənfi təsir etmir ki? Cavabında dəfələrlə belə rəqiblərlə qarşılaşıb qalib gəldiklərini və belə məqamları qabardıb futbolçuların beyninə salmaq istəmədiyini deyir.
Hoca çox soyuqqanlıdı, özgüvən, inam saçır. Bu, sözsüz ki futbolçularına da sirayət edir. Və ertəsi...
"Qarabağ" heç kimin gözləmədiyi halda az qalır "Braqa"nı öz meydanında darmadağın etsin. Avropa çempionu, Avropa Liqasının qalibi, Portuqaliya yığmasının heyətində Kriştiano Ronaldodan sonra ən çox oyun keçirmiş futbolçu Joau Moutinyonun son saniyələrdə vurduğu penalti qolu buna mane olur.
Böyükhesablı qələbə son anda alınmasa da, çox möhtəşəm nəticədi - darmadağına bərabərdi. Türkiyəli televiziya şərhçisinin dediyi kimi Qurban Qurbanovun öyrənciləri Braqada tarix yazdı.
Artur Jorje üzərində parlaq qələbə qazanmaqla qitəni silkələyən Qurban hocaya "Qarabağ"ın son vaxtlar çox qol buraxması haqda sual verirəm. Görəsən bu səbəbdən müdafiəyə və ümumiyyətlə başqa mövqelərə yeni transferlər olacaqmı? Qurbanov "qış pəncərəsi" bağlandığına görə başqa futbolçu almayacaqlarını bildirir.
Bu, həm də "Qarabağ"ın azad agent olan oyunçulara maraq göstərməməsi anlamına gəlir. Futbolumuzda yeni mərhələdi. Azərbaycan komandaları adətən klubsuz oyunçu axtarırır ki, əlavə xərcə düşməsinlər.
...2022-ci ilin fevralında, Avropa Liqasının bu mərhələsində "Braqa" ilk oyunda 2 top fərqlə uduzduğu "Şerif"ə cavab matçında eyni hesabla - 2:0 qalib gəlib penalti seriyasında mərhələ keçmişdi. Amma zərrə qədər şübhəm yox ki, bu dəfə eyni ssenari yaşanmayacaq.
Ən azı ilk qarşılaşmadan öncə Qurban Qurbanovda gördüyüm inama görə buna əminəm!
Çempionumuzun baş direktoru Emrah Çelikelin dediyi kimi növbəti mərhələyə Bakıda da qələbə qazanmaqla yüksələcəyik!
Ox yaydan çıxıb, başqa yolu yox artıq!
Allah Ozan Arifə rəhmət eləsin!
Anar Şabanoğlu, Braqa
ETOPAZ-ın dəstəyilə hazırlanıb
