Allahına Qurban!
"Qarabağ" daha bir möcüzə üçün Almaniyadadı.
Azərbaycana Çempionlar Liqasının qrup mərhələsi sevincini yaşatmış klub indi Avropa Liqasının 1/8 final mərhələsindədi.
Bəli, qitənin ikinci mötəbər avrokubok turnirinin 16 ən yaxşı komandasından biri Azərbaycan təmsilçi - Ağdamın "Qarabağ"ıdı. Bunu çox sakit, normal qarşılayırıq.
"Qarabağ" futbol psixologiyamızı dəyişib. Beynəlxalq arenada qələbələrə, uğurlara alışdırıb. Artıq Qurban Qurbanovun komandasından avrokubok çempionluğu gözləyən azarkeşlərimiz var.
Reallıqdan uzaq görünsə də, bu hissləri yaradan da elə "Qarabağ"dı. Çempionumuzun bura gəlib çıxması da sadəcə fantastikadı. Sabah qitənin ən formada olan klubuna qarşı 1/4 finala yüksəlmək üçün mübarizə aparacağıq.
Çempionumuzun məşqçilərindən biri bolqar Çudomir Çakarovun ləqəbi "Çudo"du. Yəni, möcüzə. Bolqarcadan tərcüməsi belədi. Elə ruscadan da. Bəlkə başqa dillərdən də. Möcüzə-komandanın məşqçilərindən birinin adında və ləqəbində olan bu mistik bağlantı təsadüf deyil.
"Qarabağ" Allahı sevən və Allahın sevdiyi komandadı. Bu sevginin yaratdığı inamın futbolçularımıza verdiyi güc, hər addımında işə peşəkar yanaşmaları, fədakarlıqları ilə bu yerlərə gəlib çıxmışıq. Əminəm, sabah da futbol fədailərimiz bacardığından artığını edəcək. Gerisi, Allahın işidi.
Qurban Qurbanov möhtəşəm "BayArena"da oyunöncəsi mətbuat konfransında həmişəki kimi əminlik saçır. Qurbanov psixoloq və motivator kimi də tam yetişib.
Onun şah əsəri olan "Qarabağ" Fatih Terimin UEFA kubokunu qazanmış "Qalatasaray"ını xatırladır. Çempionumuz ustalıq çatışmazlığını döyüşkənliklə, son anacan mücadilə etməklə konpensasiya edir çempionumuz. Çox istəyirəm ki, Qurban hoca Azərbaycana avrokubok qazandıranacan heç yerə getməsin.
...Nəticədən asılı olmayaraq "Qarabağ" artıq qalibdi, bir futbol komandasının mövcud imkanlarla edəcəyindən çox-çox artığını edib! Azərbaycan üçün, azərbaycanlılar üçün, futbolumuz üçün bu şəraitdə, bunu bacarmaq əsl fədakarlıqdı.
Mətbuat konfransından sonra "BayArena"nın önündə komandamızı dəstəkləmək üçün ABŞ-dan - Bostondan gəlmiş Aliki görürük. Onunla Braqada tanış olmuşduq. Adam iki həftədə ikinci dəfə okeanlar aşaraq "Qarabağ"ın matçına gəlir. Deyir "Bayer"i keçəcəyik, o biri oyuna da gələcəm. İnanır. İnanırıq!
Buna görə möcüzə-komandaya, möcüzə-baş məşqçiyə, möcüzə futbolçulara böyük təşəkkür düşür. "Qarabağ"ın səbrli, peşəkar, müdrik rəhbərliyini də unutmaq olmaz.
İnşallah, futbol qəhrəmanlarımız sabah yenə dünya azərbaycanlılarını sevindirər!
ETOPAZ-ın dəstəyilə hazırlanıb
