Yeni rəhbərlik - yeni ümidlər və ya \"Jiquli\" ilə \"Ferrari\"ni ötmək
Rövnəq Abdullayevin dövründə "Neftçi" "Pünik"i uddu. Sonra "Birlik kuboku"nu qazandı ki, o dövr üçün fantastik nəticə kimi görünürdü.
Rövnəq müəllimin kadrı olan Sadıx Sadıxovun rəhbərlik etdiyi "Neftçi" Avropa Kuboklarında qrup mərhələsinə yüksələn ilk klubumuz oldu, həmin dövr üçün bu da həqiqətən də inanılmaz idi.
"Qəbələ" iki dəfə avrokubokların qruplarına vəsiqə qazandı. "Qarabağ" Avropa futboluna Azərbaycanı tanıtdı.
Bunlar tarixdə qalacaq, heç vaxt unudulmayacaq.
Rövnəq Abdullayevin çox yaxşı insan olduğunu deyirlər. AFFA ilə vidalaşarkən "Kral öldü, yaşasın yeni kral" söyləyəcək qədər səmimidi.
Amma AFFA-dakı dəllalar bundan istifadə edib, ona uduzulan oyunlara, heç bir əhəmiyyət kəsb etməyən heç-heçələrə, qələbələrə görə kosmik məbləğdə mükafatlar verdirdi.
Futbolun inkişafına cavabdeh olanlar bu adla dövlətin, UEFA və FİFA-nın, Abdullayevin şəxsən özünün ayırdığı pulları mənimsədi, oliqarxa çevrildi.
Amma üstündən 20 ilə yaxın müddət keçsə də, 2 milyard manata yaxın pul dağıdılsa da ölkədə nə uşaq futbolu var, nə böyük futbolu. Etibar etdiyi adamlar Rövnəq Abdullayevi aldatdı...
...Rövşən Nəcəfi aldatmaq çətin görünür. Adam uşaqlıqdan futbol azarkeşi olub. Az-çox bu sahədən xəbəri var. "Neftçi"dəki təcrübəsi uğurlu alınmasa da, istənilən halda yenə də təcrübədi.
AFFA-nın rəhbər heyətində yenidən olması kütləvi narazılıqla qarşılanan Elşad Nəsirov... Elşad müəllimin yenə də futbolumuza rəhbərlik edəcək! Son 20 ildəki kimi... Bu adı görəndə istər-istəməz AFFA-nın yeni rəhbərliyinin gələcəyinə skeptik yanaşmalı olursan...
Sərxan Hacıyev, Balakişi Qasımov, Qurban Qurbanov triosundan gözləntilər böyükdü. Geniş təqdimata ehtiyacı olmayan üçlüyün Azərbaycan futbolu üçün əlindən gələni edəcəyinə şübhə yoxdu. Səmimi deyim ki, onların adını görəndə məndə bu rəhbərliyin uğurlu olacağına ümid yarandı. Bu haqda son yazılarımda ətraflı bəhs etdiyimdən indi geniş yazmağa lüzum görmürəm.
Könül Mehtiyeva AFFA-da uzun müddətdir çalışan nadir uğurlu kadrlardandı.
Rövşən Nəcəf kimi Maqsud Adıgözəlovun da ölkənin ən güclü klublarından birinə rəhbərlik etmək təcrübəsi var. Yəni, futboldan xəbərsiz biri deyil.
Səməd Qurbanovun da geniş təqdimata ehtiyacı yoxdu. "Neftçi"nin tanınmış veteranı, həm də yaxşı insandı.
Yaşlı nəsil bilir ki, futbolçu vaxtlarında Qurbanovun ləqəbi "Jiquli" olub.
AFFA-nın yeni rəhbərliyinin Elxan Məmmədov-Elşad Nəsirov cütlüyünün bataqlığın dibinə yuvarladığı Azərbaycan futbolunu xilas etməsi, ən azı bizdən xeyli öndə olan qonşularımız Gürcüstanın səviyyəsinə çatması çox çətin görünür.
Bunu "Jiquli" ilə "Ferrari"ni ötməyə bənzətmək olar.
Amma hər bir yenilik, yeni ümid yaradır. İstənilən halda Azərbaycan futbolunun gələcəyi indikindən pis olmayacaq.
AFFA-nın yeni rəhbərliyinə bu çətin missiyada uğurlar!
