Santuş “Gələcəyin millisi”ni kimlərlə qursun?
AFFA-nın yeni rəhbərliyinin verdiyi qərarlar futbol ictimaiyyəti tərəfindən böyük ümidlə qarşılanır və inkişaf strategiyasının necə həyata keçiriləcəyi səbrsizliklə gözlənilir.
Daha çox mübahisə edilən məsələ legioner limitinin ləğvidi ki, mənə görə bu qərar doğrudu. Limit olanda nə əsas milli, nə U21, nə də başqa yığmalarımız heç bir uğur qazanmayıb. Qərar qüvvəyə minməmiş də ölkə çempionatında oynamağa az şans qazanan bəzi futbolçuların xaricə yollandığını görürük.
Amma bundan sonra bu, kütləvi hal ala bilər.
Tez-tez Gürcüstanı nümunə çəkirik. Gürcülərin inkişafında əsas rol oynayan məqam futbolçuların xaricə kütləvi axınıdı.
Bizim duruma baxanda millimizin baş məşqçisi Fernandu Santuşa qibtə etmək olmur.
Xaricdə legioner həyatı yaşayan ən yaxşı futbolçularımızın sayına və yaşına diqqət edək...
...30 yaşlı Coşqun Diniyev, 30 yaşlı Rahil Məmmədov, 30 yaşlı Vüsal İsgəndərli, 28 yaşlı Mahir Emreli, 27 yaşlı Anton Krivotsyuk, 27 yaşlı Kamran Əliyev, 26 yaşlı Renat Dadaşov, 26 yaşlı Ozancan Kökçü, 24 yaşlı Zamiq Əliyev, 24 yaşlı Emil Mustafayev.
Santuşun dediyi "Gələcəyin millisi"ni qurmaq üçün bu futbolçuların potensialı az, yaşı çox görünür...
Odur ki, hələlik əsas ümidimiz Azərbaycanda oynayan futbolçularadı. Bu ayın sonuna yaxın keçiriləcək yoldaşlıq matçı da "Gələcəyin millisinin"nin konturlarını cızmaq, gəncləri sınamaq üçün əla fürsətdir. Santuşun sözləri gerçəkdirsə, Belarusla matçda aşağıdakı futbolçuları sınasa yerinə düşər:
Murad Məmmədov - 19 yaş ("Neftçi"),
Sadiq Məmmədzadə - 19 yaş ("Qarabağ")
Nihad Əhmədzadə - 19 yaş ("Sumqayıt")
Sadiq Şəfiyev - 20 yaş ("Kəpəz"),
Xəyal Əliyev - 21 yaş ("Sabah"),
Rüfət Abbasov - 21 yaş ("Şamaxı"),
Emin Rüstəmov - 21 yaş ("Səbail"),
Ağdadaş Salyanski - 21 yaş ("Neftçi"),
Nəriman Axundzadə - 21 yaş ("Qarabağ"),
Ayxan Süleymanlı - 21 yaş ("Sumqayıt"),
Mustafa Əhmədzadə - 22 yaş ("Araz Naxçıvan"),
Rza Cəfərov - 22 yaş ("Neftçi"),
Cəlal Hüseynov - 22 yaş ("Şamaxı"),
Rauf Rüstəmli - 22 yaş ("Şamaxı").
Portuqaliyalı Avropa çempionu "Ankaragücü"nün 18 yaşlı forvardı Həsən Nəzərliyə də şans versə, əla olar.
Bu 15 nəfərə bəzi daha yaşlı futbolçuları da əlavə etsək, gənclərlə təcrübəlilərin vəhdəti də yaradıla bilər. Məsələn, Mahir Emreli, Elvin Cəfərquliyev, Toral Bayramov, Renat Dadaşov, Musa Qurbanlı, Səbuhi və Rüfət Abdullazadələrin adlarını çəkmək və siyahını uzatmaq olar.
Fikrimcə, hər mövqedə bir nəfər çox təcrübəli futbolçunun olması da gənclərin baxıb öyrənməsinə fayda verər. Bu mənada məsələn Şahruddin Məhəmmədəliyev, Bədavi Hüseynov, Emin Mahmudov və Mahir Emrelini qeyd edə bilərəm.
Bu cür oyunlarda şans qazanan gənclər sınaqdan keçəndən sonra artıq Santuş üçün "Gələcəyin heyəti"ni qurmaq daha asan olacaq.
