“Səviyyəmizdən aşağı çıxış etdik” - Dambrauskas

“Sabah” Azərbaycan kubokunun 1/4 final mərhələsinin ilk oyununda bu gün “Qəbələ”ni qəbul edib.

Sports.az xəbər verir ki, 0:0 hesabı ilə yekunlaşan matçdan sonra “bayquşlar”ın baş məşqçisi Valdas Dambrauskasın mətbuat konfransı keçirilib. Litvalı mütəxəssis çox ağır oyun olduğunu bildirib:

“Bu gün həqiqətən çox ağır oyun oldu. “Qəbələ”ni təbrik etmək istəyirəm. Çox yaxşı performans göstərdilər. Fərqlənə də bilərdilər. Biz bu gün səviyyəmizdən aşağı çıxış etdik. Yaradıcılıq yox idi. Bir şansımız oldu, ondan da yararlana bilmədik. İnanıram ki, cavab oyununda daha yaxşı çıxış edib sevinən tərəf olacağıq. Sabahdan hazırlıqlarımıza başlayacağıq. Çünki bizi bazar günü çox çətin oyun gözləyir.

Hər oyunda qol vursaq da, bu gün fərqlənə bilmədik. Biz hər oyunda qalib gəlmək istəyirik. Amma bu gün enerjimiz, istəyimiz çatışmırdı. Pressinq də istədiyimiz kimi deyildi. Amma hər oyunda qələbə qazanmaq olmaz. Çünki rəqiblər də bizi təhlil edir. Necə ki, “Qəbələ” bizi çox yaxşı təhlil etmişdi. Amma nə etmək olar? Sabahdan məşqlərimizi bərpa edib, hazırlaşmalıyıq. Heç kim deyə bilməz ki, hər oyunda qalib gəlməliyik.

Əsas heyətdə çox yaxşı oyunçular var idi. Mənim üçün ilk “11-lik” anlayışı yoxdur. Bu gün oyunçular meydançada döyüşdülər. Amma biz də insanıq, heç vaxt deyə bilmərik hər oyunda qalib gəlməliyik. Səhvlərimizdən nəticə çıxarmalıyıq. Onu da deməliyik ki, “Qəbələ” bu gün çox yaxşı çıxış etdi.

Mən bunu dəfələrlə təkrar etmişəm, gələcəyin bizə nələr gətirəcəyini deyə bilmərəm. Bizim üçün əsas olan məşqlərimizdir. Mənim 22 oyunçum var. Məşqlərdə gəlib görsəz, onlar necə vuruşurlar… Amma mənim cəmi beş oyunçu dəyişmək haqqım var. Bizim üçün qurban vermək anlayışı yoxdur”.