AFFA-da islahatlar olacaqmı?
Çoxları bəlkə də fikir vermədi. "Turan" - "Qarabağ" oyununda hər iki komandanın heyətində "Qəbələ" Futbol Akademiyasının futbolçuları - Ehtiram Şahverdiyev və Bəhlul Mustafazadə fərqləndi.
AFFA-nın uzaqgörən siyasəti nəticəsində "Qəbələ" Futbol Akademiyası məhv olur. Avrokuboklarda görməyə öyrəşdiyimiz klub transfer etməyə pul tapmır.
Tovuz kimi futbolçu konveyerinin heyətində həmişə yerli futbol məktəbinin yetirmələri parlayardı. Amma orda da uşaq futbolunu çökdürüblər.
Buraxın Tovuzu, illərdi Avropada başımızı ucaldan "Qarabağ"da da uşaq futbolu sanki, məcburiyyətdən fəaliyyət göstərir. "Qarabağ"ın beynəlxalq arenadakı çıxışını, ordakı rəhbər şəxslərin qabiliyyətini görəndən sonra belə bu kluba heç olmasa, "Qəbələ" kimi akademiya qurmaq üçün imkan yaradılmadı.
AFFA-nın son 15 ildə Azərbaycan futboluna vurduğu zərbəni düzəltmək üçün ən azı daha 15 il lazımdı. Təəssüf ki, hələ dəyişən bir şey yoxdu.
Şükr, illərdir məhv etdikləri "Turan"ı bərpa edib, Premyer Liqaya gətirdilər. Amma bu klub yenə AFFA-nın nəzarətindədi. Ayxan Abbasov sınıq-salxaq heyətlə, məhdud büdcəylə, yoxdan konfet düzəltməyi bacarıb. AFFA imkan versə, tovuzlular özləri 1 ilə Azərbaycan çempionatında çempionluğa oynayacaq komanda qurar, klub yaradar.
Amma imkan verməz. Sponsorluq etmək istəyənlərə deyirlər ki, pul verin, biz öz adamlarımızı kluba rəhbər qoyaq, onlar sizin pulun hara getdiyinə nəzarət eləsin...
Hamı bu ili səbrsizliklə gözləyirdi ki, AFFA-da islahatlar olacaq. Gənclər və İdman Naziri Fərid Qayıbov da bu haqda açıqlama verib ki, futbolumuzda islahatlara ehtiyac var. Yəni, bunu artıq dövlət də bilir.
Artıq gözdən pərdə asmaq mümkün deyil. AFFA-da dəyişiklər olmasa, Azərbaycan futbolundan heç bir uğur gözləməyə dəyməz. AFFA-nın birbaşa nəzarətində olan köklü klublarımız "Neftçi" ilə "Kəpəz"in durumuna baxın...
Millinin oyunlarına da çox qalmayıb. Bu gedişlə, yenə, köhnə hamam, köhnə tas...
Futbolumuzun real vəziyyətini görmək üçün, mövsümün sonunu gözləməyə ehtiyac yoxdu, cənablar!
