Bakıda keçirilən şahmat üzrə Dünya Kubokunda üçüncü yer uğrunda ilk oyunda qələbə qazanan Nicat Abasov turnirin rəsmi saytına açıqlama verib.

Sports.az xəbər verir ki, Azərbaycan şahmatçısı ABŞ təmsilçisi Fabiano Karuana üzərində ilk oyunda qazanılan qələbənin önəmli olduğunu bildirib:

“İlk oyun mənim üçün rahat oldu. Karuananın səhvindən sonra qələbə qazanmağıma heç nə mane ola bilməzdi. Fabiano gözləmədiyim səhvə yol verdi. Düzgün gedişləri edərək oyunu qələbə ilə başa vurdum. Belə səhv Karuana kimi güclü şahmatçıya xarakterik deyil. Dünya Kuboku artıq uzun müddətdir davam edir, əksər şahmatçılar yorulub. Fabiano ötən gün tay-brekdə də mübarizə aparıb. Yorğunluq özünü göstərə bilər. Məndə də bir qədər yorğunluq var. Dünən oynamadığım üçün bərpa oluna bildim”.

Abasov üçüncü yer uğrunda oyunda sona qədər mübarizə aparacağını söyləyib: “Sabah cavab oyunudu. Arxayınlaşmaq olmaz. Mənə dəstək olan hər bir kəsə təşəkkür edirəm. Bütün Azərbaycanın dəstəyini hiss edirəm. Üçüncü yer uğrunda mübarizə çox vacibdir. İlk üçlükdə olmaqla İddiaçılar Turnirində iştirakımı rəsmiləşdirmək istəyirəm”. 

Sabah keçiriləcək cavab görüşü saat 15:00-da başlayacaq.