"Kəpəz"in baş məşqçisi Azər Bağırov Premyer Liqadakı əcnəbi mütəxəssislərin qəniminə çevrilib. 

Sports.az Premyer Liqada qalmaq uğrunda mübarizə aparan klubun xeyli artıq büdcəyə və bahalı heyətə malik rəqiblərlə oyunlarının nəticələrini təqdim edir. 

04.10.2024 
"Kəpəz" - "Neftçi" - 4:3 

Bu oyundan sonra təcrübəli ukraynalı baş məşqçi Roman Qriqorçuk "Neftçi"dən gedib.

09.11.2024 
"Sabah" - "Kəpəz" - 2:2 

Növbəti oyunda səfərdə "Turan Tovuz"la heç-heçədən sonra xorvatiyalı baş məşqçi Krunoslav Renduliç "Sabah"dan gedib.

19.01.2025 
"Kəpəz" - "Turan Tovuz" - 5:2 

Bu qarşılaşmadan sonra "Turan Tovuz"un təcrübəli türkmən baş məşqçisi Kurban Berdıyev komandasını toparlamağı bacarıb və tovuzlular səfərdə "Qarabağ" üzərində əzmkar qələbə qazana biliblər. 

31.01.2025
"Kəpəz" - "Sabah" 3:2 

"Kəpəz"in bu qələbəsi ilə "Sabah"ın qələbəsiz seriyası 4 oyuna çatıb. Masazır təmsilçisi bu qarşılaşmalarda gəncəlilərdən başqa "Şamaxı"ya uduzub, "Neftçi" və "Sumqayıt"la heç-heçə edib. Görəsən, "Sabah" rəhbərliyi Vasili Berezutski ilə bağlı hansı qərar verəcək?

Sonda qeyd edək ki, Azər Bağırov yalnız əcnəbi mütəxəssislərə "mərdimazarlıq" etməyib. Noyabrın 3-ü keçirilən və "Kəpəz"in 1:0 hesablı qələbəsi ilə bitən "Səbail"lə oyundan sonra "dənizçilər"in baş məşqçisi Şahin Diniyev də istefa verib.