“Daha zəif komanda ilə qarşılaşmaq da mümkün idi”
Xəbər verdiyimiz kimi, bu gün UEFA Çempionlar Liqasının 1/8 və 1/4 final mərhələlərinin püşkü atılıb.
Sports.az xəbər verir ki, təmsilçimiz “Araz-Naxçıvan” yeni formatda keçirilən turnirin 1/8 final mərhələsində Portuqaliyanın “Benfika” klubu ilə qarşılaşacaq.
Bu komandalar arasında ilk oyun noyabrın 24-də Bakıda, cavab görüşü dekabrın 5-də səfərdə keçiriləcək.
“Araz-Naxçıvan”ın kapitanı Emin Kürdov federasiyanın rəsmi saytına püşkü dəyərləndirib:
“11 ildən sonra bu mərhələyə vəsiqə qazandıq. Bu dəfə yarış fərqli formatda keçiriləcək. İndi elit-raund deyil, 1/8 final mərhələsi tətbiq olunur. Səbətdə yer alan komandalar arasında zəif iştirakçı yox idi. Ona görə çətin olacağını bilirdik. Ancaq püşk üzümüzə gülsəydi, hazırkı rəqibimizlə müqayisədə nisbətən zəif komanda ilə qarşılaşmaq da mümkün idi. Bu dəfə reytinq cədvəlinin ikinci pilləsində qərarlaşan “Benfika” ilə rəqib olduq. Heyətlərində keyfiyyətli, güclü futzalçılar yer alıb. Buna baxmayaraq, mübarizə aparacağıq. Təəssüf ki, heyətimiz də optimal deyil. Əsas mərhələdən sonra 2 futzalçımız cəzalı duruma düşüb, bir oyunçumuz isə Rumıniyadakı oyunlar zamanı zədələnib. Hazırlaşacağıq, məşqçilər korpusunun da təlimatlarını alacağıq. Evdə oynadığımıza görə, azarkeşlərin arenaya gələcəklərinə, nəticədən asılı olmayaraq komandamıza dəstək olacaqlarına inanırıq. Noyabrın 24-dək vaxtımız var. Oyuna qədər olan müddətdən yaxşı istifadə edəcəyik”.
