AFFA-da iki komandanın şikayətinə baxıldı
AFFA Apellyasiya Arbitraj Tribunalı Region Liqasında mübarizə aparan iki komandanın şikayətinə baxıb.
Sports.az AFFA-ya istinadən xəbər verir ki, “Xıdırlı”nın şikayəti qismən təmin edilib, “Qobu”nun cəzası qüvvədə saxlanılıb.
“Xıdırlı” Futbol Klubunun (Region Liqası) “Xıdırlı” FK – “Viləş” PFK oyunu ilə bağlı verilən qərardan şikayətə baxılmasına dair:
1. “Xıdırlı” Futbol Klubu tərəfindən verilən apellyasiya şikayəti qismən təmin edilsin.
2. 21 dekabr 2025-ci il tarixində AFFA Region Liqasında keçirilən “Xıdırlı” FK – “Viləş” PFK oyununun 45+1-ci dəqiqəsində “Xıdırlı” komandasının 8 nömrəli futbolçusu Rəsul Hacıyev rəqibə fiziki təzyiq göstərdiyinə görə qırmızı vərəqə aldığı üçün 3 oyuna buraxılması və həmin oyunun 45+1-ci dəqiqəsində “Xıdırlı” komandasının azarkeşlərinin meydançaya daxil olub rəqib futbolçulara fiziki təzyiq göstərdiyinə görə “Xıdırlı” komandasının növbəti 2 oyunu öz azarkeşləri olmadan keçirməsi barədə İntizam Komitəsinin 26 dekabr 2025-ci il tarixli qərarı qüvvədə saxlanılsın.
3. Apellyasiya Arbitraj Tribunalı tərfindən aparılmış araşdırmalara əsasən, İntizam Məcəlləsinin 10, 34, 99 və 100-cü maddələri əsas götürülməklə “Xıdırlı” Futbol Klubunun təqsiri olmadığı müəyyən edilsin və 21 dekabr 2025-ci il tarixində AFFA Region Liqasında keçirilən “Xıdırlı” FK – “Viləş” PFK oyununda azarkeşlər meydana daxil olaraq rəqib oyunçulara fiziki təzyiq göstərdiyi, nəticədə təhlükəsizlik tam təmin olunmadığına görə oyun yarımçıq dayandırıldığı üçün “Xıdırlı” FK komandasına 0:3 hesablı texniki məğlubiyyət verilməsi barədə İntizam Komitəsinin 21 dekabr 2025-ci il tarixli qərarı ləğv edilsin.
4. Apellyasiya Arbitraj Tribunalının Əsasnaməsinin 2.1.1-ci maddəsinə əsasən “Xıdırlı” FK – “Viləş” PFK arasında olan oyunun ikinci hissəsi yenidən və neytral stadionda keçirilsin.
5. Apellyasiya Arbitraj Tribunalının qərarından Lozannadakı (İsveçrə) İdman üzrə Arbitraj Məhkəməsinə (CAS) şikayət verilməsinin mümkünlüyü maraqlı tərəflərə izah edilsin.
“Qobu” Peşəkar Futbol Klubunun (Region Liqası) “Crystal” FC – “Qobu” PFK oyunu ilə bağlı verilən qərardan şikayətə baxılmasına dair:
1. “Qobu” Peşəkar Futbol Klubu tərəfindən verilən apellyasiya şikayəti təmin edilməsin.
2. 29 noyabr 2025-ci il tarixində AFFA Region Liqasında keçirilən “Crystal” FC – “Qobu” PFK oyunu bitdikdən sonra “Qobu” PFK komandasının heyətində 10 nömrəli futbolçu Emin Əlicanov təcavüzkar davranışa (rəqibi əli ilə vurduğuna), eyni zamanda hakimlərə fiziki təzyiq göstərdiyinə görə qırmızı vərəqə ilə cəzalandırıldığı üçün növbəti 10 (on) oyuna buraxılmaması barədə İntizam Komitəsinin 4 dekabr 2025-ci il tarixli qərarı qüvvədə saxlanılsın.
3. Apellyasiya Arbitraj Tribunalının qərarından Lozannadakı (İsveçrə) İdman üzrə Arbitraj Məhkəməsinə (CAS) şikayət verilməsinin mümkünlüyü maraqlı tərəflərə izah edilsin.
