AAF-ın prezidenti çexiyalı həmkarını qəbul edib
Azərbaycan Ağırlıqqaldırma Federasiyasının prezidenti Kamran Nəbizadə, Avropa Ağırlıqqaldırma Federasiyasının İcraiyyə Komitəsinin üzvü, Çexiya Ağırlıqqaldırma Federasiyasının prezidenti Duşan Kovaçı qəbul edib.
Sports.az xəbər verir ki, görüşdə həmçinin Beynəlxalq Ağırlıqqaldırma Federasiyasının “Məsləhət qrupu”nun üzvü və AAF-ın vitse-prezidenti Firdovsi Umudov da iştirak edib.
Söhbət zamanı iki ölkənin federasiyaları arasındakı əlaqələrin inkişaf perspektivləri müzakirə edilib. Gələcəkdə Azərbaycan və Çexiya atletlərinin iştirakı ilə birgə təlim-məşq toplanışlarının və seminarların təşkili ətrafında fikir mübadiləsi aparılıb.
Görüşün sonunda AAF-ın prezidenti Kamran Nəbizadə qonaq həmkarına federasiya adından xüsusi hədiyyə təqdim edib. Duşan Kovaç da öz növbəsində Kamran Nəbizadəyə Çexiya Ağırlıqqaldırma Federasiyasının xatirə medalını verib.
Daha sonra çexiyalı qonaq AAF-ın vitse-prezidenti Firdovsi Umudovla birgə yığma komandamızın təlim-məşq bazası ilə tanış olub. Duşan Kovaç gənc və yeniyetmə atletlərin hazırlıq prosesini izləyib. Atletlərimizə yaradılan şəraitin yüksək səviyyədə olduğuna diqqət çəkən qonaq, nəticələrin qazanılmasında bu məqamın vacibliyini vurğulayıb. Sonda Duşan Kovaç və Firdovsi Umudov komanda üzvləri ilə xatirə fotosu çəkdirib.
