Millimiz MDB Oyunlarında Özbəkistanla qarşılaşacaq

III MDB Oyunlarında 15 yaşadək voleybolçu qızlar arasında finalçılar müəyyənləşib.

Sports.az xəbər verir ki, bu gün Gəncə İdman Sarayında keçirilən yarımfinal qarşılaşmalarında ilk olaraq Azərbaycan və Belarus yığmaları üz-üzə gəlib.

Gərgin mübarizə şəraitində keçən oyun Belarus millisinin 3:1 hesablı qələbəsi ilə yekunlaşıb.

Daha sonra Rusiya və Özbəkistan komandaları finala vəsiqə uğrunda qarşılaşıblar. Bu oyunda Rusiya yığması rəqibini 3:0 hesabı ilə məğlub edərək finala yüksəlib.

Beləliklə, oktyabrın 6-da keçiriləcək finalda Belarus və Rusiya milliləri qızıl medal uğrunda mübarizə aparacaqlar. Bürünc medal uğrunda qarşılaşmada isə Azərbaycan və Özbəkistan yığmaları üz-üzə gələcəklər.

Yarımfinal

5 oktyabr
Azərbaycan – Belarus 1:3 (25:19, 22:25, 18:25, 17:25)
Rusiya – Özbəkistan 3:0 (25:6, 25:17, 25:7)

6 oktyabr

Bürünc medal 
10:00. Azərbaycan - Özbəkistan
Final
13:00. Belarus - Rusiya