“Azərbaycana gəldikdən sonra doğru qərar verdiyimi anladım”
“Sumqayıt” komandasının oyun qurucusu Keon Klerqot klubun mətbuat xidmətinə müsahibə verib.
Sports.az xəbər verir ki, o, əvvəlcə ölkəmizdən gələn təklif və buradakı şəraitdən danışıb:
“Azərbaycandan gələn təklif məni sevindirdi. Bura gəldikdən sonra doğru qərar verdiyimi anladım. Ölkənizi çox xoşlayıram. Yeməkləriniz ümumiyyətlə əladır”.
Amerikalı basketbolçu Sumqayıtla Bakı arasında müqayisə də aparıb:
“Sumqayıt dənizkənarı şəhərdir. Mən sahildə gəzməyi çox sevirəm. Bakıda da olmuşam, bu şəhər də çox xoşuma gəlib. Mən deyərdim ki, Bakı Sumqayıtdan daha qəşəngdir. Paytaxtınızı Orlando şəhərinə daha çox bənzədirəm”.
Klerqot komandadakı ab-havadan və ilk iki oyundakı məğlubiyyətdən də danışıb:
“Komandadakı şərait də ürəyimcədir. Baş məşqçi də mənə köməklik göstərir. Kollektiv daxilində çox yaxşı atmosfer var. Hərçənd ilk iki oyunda məğlubiyyət heç yerinə düşmədi. Toparlanacağımıza inanıram”.
