Azərbaycan güləşçisi Budapeştdə keçirilən beynəlxalq turnirdə çempion olub
Azərbaycanın yunan-Roma güləşçisi Elmin Əliyev Budapeştdə Macarıstanın tanınmış güləş məşqçisi İmre Baracsinin xatirəsinə həsr olunan beynəlxalq turnirdə qızıl medal qazanıb.
Sports.az xəbər verir ki, U-17 Avropa çempionatının bürünc mükafatçısı olan Əliyev 82 kq çəki dərəcəsində bütün rəqiblərinə qalib gələrək fəxri kürsünün ən yüksək pilləsinə qalxıb.
Ənənəvi yarışda U-20 yaş qrupu üzrə millinin bir neçə üzvü də iştirak edib. Məşqçi Emin Əhmədovun rəhbərliyi altında mübarizə aparan Kamran Rəcəbli (72 kq), Cavad Məmmədov (77 kq) və Məzaim Mərdanov (130 kq) Memorialda mükafat qazana bilməyiblər.
Yarış bitdikdən dərhal sonra güləşçilərimiz Macarıstanın Tata şəhərinə yollanıblar. Belə ki, onlar mayın 2-dək bu şəhərdə bir neçə komandanın iştirakı ilə keçiriləcək təlim-məşq toplanışına qatılıblar.
