Azərbaycan güləşçisi ABŞ-də bürünc medal qazanıb
Sərbəst güləş üzrə U20 millisinin və Azərbaycan İdman Jurnalistləri Assosiasiyasının (AİJA) idmançısı Nicat Həsənov Amerika Birləşmiş Ştatlarının Nyu-York şəhərində keçirilən “Journeymen World Classic” beynəlxalq turnirində bürünc medal qazanıb.
63.5 kiloqram çəki dərəcəsində çıxış edən Nicat, iki amerikalı rəqibinə qalib gəldikdən sonra yarımfinalda Kanada idmançısına məğlub olaraq 3-cü yer uğrunda mübarizəni davam etdirib. O, bürünc medal görüşündə Gürcüstan təmsilçisinə qalib gələrək fəxri kürsüdə yer alıb.
Turnirdə komandamızı baş məşqçi kimi AİJA-nın vitse-prezidenti və güləş komissiyasının sədri, əməkdar məşqçi Ramin Allahverdiyev təmsil edib. Tovuz Gənclər Evinin direktoru və Beynəlxalq İdman Mətbuatı Assosiasiyasının (AIPS) üzvü Rauf Rüstəmov da nümayəndə heyətinin tərkibində Amerikaya yollanıb.
ABŞ və Azərbaycan arasında güləş əlaqələrinin inkişafına verdiyi töhfəyə görə turnirin təşkilatçısı Frank Popolizio Azərbaycan Güləş Federasiyası tərəfindən təşəkkürnamə ilə təltif edilib. Turnirin təşkilatı işlərinə cavabdeh Marilena Popolizioya üzərində Azərbaycan mədəniyyətini və incəsənətini özündə əks etdirən hədiyyələr təqdim olunub.
Komandamızın səfərinə Go Fitness klubu da öz dəstəyini nümayiş etdirib.
