Yayda etdiyi dəyişiklərdən sonra mövsümə iddialı start götürəcəyi proqnozlaşdırılan “Səbail” hələ ki, ümidləri doğrultmur. 

Mövsümlərarası fasilədə “Mariupol”dan gələn Petro Stasyuk isə komandasının vəziyyətinin dəyişəcəyinə inanır. 27 yaşlı ukraynalı müdafiəçi Sports.az saytına blits-müsahibədə "Səbail"in avrokuboklara vəsiqə şanslarını dəyərləndirir. 

- Premyer Liqadan avrokuboklara vəsiqə şansınızın minimuma endiyini nəzərə alsaq, razısınız ki, “Səbail”in son ümidi ölkə kubokudur?
- Razı deyiləm. Çempionatda qarşıda çox oyunlar var. Vəziyyəti düzəltmək olar. İnanıram ki, turnir cədvəlində mümkün qədər yuxarı pillələrə qalxa biləcəyik. Amma Azərbaycan kuboku da bizim üçün heç də az əhəmiyyətli turnir deyil və çox vacibdir. 

- Kubokun 1/8 final mərhələsində MOİK-i 4:0 hesabı ilə məğlub etdiniz. Bu onu deməyə əsas verir ki, Premyer Liqa ilə Birinci Divizion arasında uçurum var?
- Hesabın belə alınmasına baxmayaraq, matç maraqlı keçmişdi. Liqalar arasındakı fərqə gəlincə, deyərdim ki, Premyer Liqa komandaları daha güclüdür. Amma belə rəqibləri aşağı qiymətləndirsək, onlara qarşı çətin anlar yaşayarıq. 

- Bu həftə ölkə kubokunun 1/4 finalında “Sabah”la üz-üzə gələcəksiniz. Nəyə ümid edirsiniz?
- İstər ölkə kuboku, istərsə də çempionat olsun, hər oyuna qalib gəlmək məqsədilə çıxırıq. Rəqibin və turnirin bizim üçün fərqi yoxdur. Meydanda sadəcə qalibiyyət barədə fikirləşirik.