“Azərbaycan bayrağı yalnız ən yüksək zirvədə dalğalanmağa layiqdir!”
Natiq Nəsirov, Budapeşt
Macarıstanında keçirilən "Böyük Dəbilqə" turnirində cüdoçumuz Səid Mollayi finalda ədalətsizliklə üzləşərək çempionluğu qaçırıb.
Hər iki finalçının iki xəbərdarlığının olduğu və Səidin rəqibini aşkar üstələdiyi bir məqamda hakim təmsilçimizə üçüncü xəbərdarlıq verərək çempionluğu əlindən alıb. Bu qərar tribunalardakı azarkeşləri də təccübləndirib.
Sports.az dünyaşöhrətli idmançımızla finaldan dərhal sonra eksklüziv blits-müsahibə alıb.
- Səid, öncə səni Sports.az adından Azərbaycan millisində uğurlu debütün münasibətilə təbrik edirik. Turnir haqda təəssüratlarını eşidək...
- Təşəkkür edirəm. Amma mən bura qızıl medal qazanmağa gəlmişdim. Azərbaycanımın bayrağı altında ilk yarışımda çempion olmaq istəyirdim. Heyf ki, bu arzumu yerinə yetirə bilmədim. Buna görə Azərbaycan xalqından üzr istəyirəm.
- Qazandığın medal da yetərincə böyük uğurdu. “Grand Slam”da ikinci yer heç də pis nəticə deyil...
- Minnətdaram. Amma Azərbaycan yalnız birinci yerə layiqdir. Bundan sonra daha böyük qələbələr qazanacağıma söz verirəm.
- Qarşıda Daşkənddə dünya çempionatı var. Gözləntilərin nədir?
- Allah qismət eləsin, Azərbaycanım üçün daha yüksək əyarlı medal qazanım.
- Səni ağır mücadilədən ardından çox yormayaq. Son olaraq yeni açılacaq Sports.az saytının oxucuları üçün nə demək istəyərdin?
- Mən İranda da, başqa ölkələrdə də olanda hər zaman demişəm ki, azərbaycanlıyam, bununla hər zaman fəxr etmişəm və fəxr edirəm. Həmişə belə olub və olacaq. Bu gün çox istəyirdim ki, “qızıl” qazanıb xalqımızı sevindirim. Təəssüf... Amma bundan sonra var gücümlə çalışacam ki, çempion olub xalqıma daha böyük sevinc bəxş edim.
