DÇ: Azərbaycan güləşçisi erməniyə qalib gələrək finala çıxdı

Azərbaycanın yunan-Roma güləşçisi Nihad Quluzadə Bolqarıstanın paytaxtı Sofiyada keçirilən U-20 dünya çempionatında finala yüksəlib.

Sports.az xəbər verir ki, 55 kq-da çıxış edən idmançı yarımfinalda ermənistanlı Karapet Manvelyanla qarşılaşıb.

Quluzadə ilk hissədə hesabda geri düşsə də, ikinci yarıda vəziyyəti öz xeyrinə dəyişə bilib. Yekunda 2:1 hesablı qələbə qazanan Azərbaycan təmsilçisi adını həlledici qarşılaşmaya yazdırıb.

Onun finaldakı rəqibi rumıniyalı Denis Florin Mihay olacaq.

Qeyd edək ki, bu gün həmçinin 87 kq-da Laçın Vəliyev yarımfinal görüşünə çıxacaq. O, finala gedən yolda iranlı Əbülfəzl Əli Çobani ilə qarşılaşacaq.