“Mançester Siti” “Mançester Yunayted”i milyonların gözü qarşısında…”
“Mançester Yunayted”in ingilis sabiq hücumçusu Maykl Ouen “qırmızı şeytanlar”ın “Mançester Siti” ilə qarşılaşacağı İngiltərə Kubokunun finalı ilə bağlı gözləntilərini paylaşıb.
Sports.az xatırladır ki, “Mançester Yunayted” Premyer Liqanın 36-cı turunda səfərdə “Kristal Pelas”a 0:4 hesabı ilə məğlub olub və Ouen bu oyunu əsas gətirərək, İngiltərə Kubokunun qarşıdakı finalı haqda fikir yürüdüb:
“Onlar bugünkü kimi oynasalar hələ oynamadıqları hər komanda tərəfindən meydandan qovulacaqlar. “Mançester Siti” onları “Uembli”də milyonlarla insanın gözü qarşısında yerlə-yeksan edə bilər, bu, utancvericidir. Nəsə dəyişməlidir. Düşünürəm ki, indi çox vacib oyunlar olduğu üçün bu, dəyişməlidir. Bu, gələn mövsüm avrokubokların taleyini həll edə bilər, bu, bir kubokdur”.
