Ten Haqın taleyini Cim Retklifin köməkçiləri həll edəcəklər

“Mançester Yunayted”in ortaq sahibi ser Cim Retkliff klubun üç direktoruna “qırmızı şeytanlar”ın baş məşqçisi Erik ten Haqın cari mövsümün sonunda vəzifəsində qalıb-qalmaması ilə bağlı qərar verməyi tapşırmaq niyyətindədir.

Sports.az xəbər verir ki, niderlandlı mütəxəssisin klubdakı taleyini icraçı direktor Jan-Klod Blan, yeni texniki direktor Ceyson Uilkoks və tezliklə “Mançester Yunayted”in yeni idman direktoru olacaq Den Eşvort müəyyənləşdirəcəklər.

Mütəxəssislərin “Erik ten Haqın ümumi yanaşmasını, paltardəyişmə otağı ilə münasibətini, nüfuzunu, eləcə də onun üçün mümkün əvəzləyici tapmaq qabiliyyətini” qiymətləndirəcəyi vurğulanır. Bütün bu məqamları təhlil etdikdən sonra köməkçilər Ten Haqın gələcəyi ilə bağlı yekun qərar verəcəklər.