Azərbaycanın yeddi sərbəst güləşçisi Gürcüstanda medal qazanıb
Həftəsonu Gürcüstanın Qori şəhərində sərbəst güləş üzrə “Şxireli kuboku” turniri keçirilib.
Sports.az xəbər verir ki, U-20 yaş qrupu üzrə keçirilən turnirdə Gürcüstan, Azərbaycan, ABŞ, Qazaxıstan və İran komandaları iştirak edib.
Məşqçilər Rövşən Hacıyevlə Nazim Əlicanovun rəhbərliyi altında 7 güləşçi ölkəmizi ənənəvi yarışda təmsil edib. Millimizin bütün üzvləri fəxri kürsüyə qalxıb.
Vasif Bağırov (57 kq), Musa Verdiyev (65 kq) və Ramik Heybətov (70 kq) bütün rəqiblərinə qalib gələrək çempion olublar. Camal Abbasov (61 kq) ikinci, Əhməd Əhmədli (74 kq), Emin Qocayev (79 kq) və Sadiq Mustafazadə (86 kq) isə üçüncü yeri tutub.
Beləliklə, komandamız turniri 3 qızıl, 1 gümüş və 3 bürünc medalla başa vurub.
Xatırladaq ki, “Şxireli kuboku”nda beynəlxalq dərəcəli hakimlər Xəzər Allahverdiyevlə Eldar Bayramov ədaləti qoruyub.
