Azərbaycan Güləş Federasiyası Lənkəranda seminar keçirib
Azərbaycan Güləş Federasiyası (AGF) Lənkəranda seminar keçirib.
Sports.az xəbər verir ki, Olimpiya İdman Kompleksində təşkil edilən tədbirdə Lənkəran, Astara, Lerik, Masallı, Yardımlı və Cəlilabaddan olan məşqçilər iştirak edib.
Seminarın nəzəri hissəsində əvvəlcə Lənkəran-Astara Regional Gənclər və İdman İdarəsinin idman şöbəsinin müdiri Yusif Xamiyev tədbirin təşkilinə görə Azərbaycan Güləş Federasiyasına (AGF) təşəkkürünü bildirib.
AGF Hakimlər Kollegiyasının sədri Qərib Əliyev son zamanlar federasiyanın bölgələrdə fəaliyyət göstərən güləş zallarına verdiyi dəstəyə diqqəti yönəldib. Sərbəst güləş üzrə U-17 millinin məşqçisi Əsgərxan Novruzov yerli mütəxəssislərlə qarşılıqlı fikir mübadiləsi aparıb, onların problemlərini dinləyib və öz tövsiyələrini çatdırıb. Yunan-Roma güləşi üzrə U-20 millinin məşqçisi Zöhrab Abbasov idmançıların məşqlərə davamiyyətinin və tez-tez güləş məktəblərinin bir-biriylə dostluq görüşləri keçirməsinin vacib olduğunu deyib.
I-S kateqoriyalı referi Sədi Quliyev video görüntülərlə yarışlarda yaranmübahisəli epizodları şərh edib. Seminarın praktiki hissəsi isə Z.Abbasovun keçdiyi nümunəvi məşqdən ibarət olub.
Güləş məşqçilərinin Ümumrespublika seminarının növbəti mərhələsi sabah Sabirabad şəhərində keçiriləcək.
