“Fantastik bir qələbədir” – “Ordu”nun baş məşqçisi
“Çox çətin oyun oldu, bununla belə, qələbə qazanmağı bacardıq"
Sports.az xəbər verir ki, bunu “Ordu”nun baş məşqçisi Alberto Blanko “Gəncə”yə qalib gəldikləri oyundan (93:90) sonra klubun mətbuat xidmətinə açıqlamasında deyib.
İspaniyalı mütəxəssis hazırkı vəziyyətdə bu qələbəni çox vacib hesab etdiyini bildirib:
"Çünki kifayət qədər problemlərimiz var. Əsas heyətin iki aparıcı üzvü zədəyə görə matçı buraxırdılar. Uşaqlar əla çıxış etdilər. Fantastik bir qələbədir. Oyunçularımı təbrik edirəm. Birinci yer uğrunda mübarizə aparırıqsa, mütləq belə oyunlarda qalib gəlməliyik.
Blanko oyuna uğursuz başladıqlarını vurğulayıb: "Hesabda böyük fərq yaranmışdı. Ancaq 3-cü perioddan başlayaraq meydanda daha yaxşı mübarizə apardıq. Görüş o qədər gərgin keçdi ki, overtayma ehtiyac yarandı. Bu hissədə isə biz qalib gəldik. Ancaq “Gəncə” komandası çox əzmkar mübarizə apardı. 3 xallıq atışlarda komanda hələ ki, istənilən nəticəni verə bilmirik. Belə olanda xal qazanmaq üçün başqa vasitələrdən, daha mürəkkəb hücumlardan istifadə edirik. Ancaq 3 xallıq atışlar üzərində işləyirik. Çünki bir çox oyunlarda belə atışlardan istifadə edə bilməmişik. İnanıram ki, gələcək oyunlarda belə problemlər olmayacaq. Özüm də bir həftədir xəstəyəm. Ancaq bu qələbə mənə əlavə ruh yüksəkliyi verdi”.
