"İmişli"ni də udacağıq" - "Kəpəz"in gündəm olan azarkeşi
Premyer Liqanın 8-ci turunda "Kəpəz" "Şamaxı" ilə səfər qarşılaşmasında nəhayət bu mövsüm ilk xalını və ilk qələbəsini qazandı. Özü də 4:1 hesablı darmadağınla.
Qarşılaşmadan sonra "Kəpəz"in köhnə-yeni baş məşqçisi Azər Bağırovun bu sözləri gündəm oldu:
- Bu qələbəni azarkeşlərimizə, xüsusən də, balaca azarkeşimiz var - Babək, ona həsr edirəm. Babək Gəncədən gələndə mənə demişdi ki, Azər müəllim, qələbə qazanacağıq. Bu da mənə əlavə motivasiya oldu. Ona görə onu xüsusi vurğuladım.
Bəs Babək kimdir? Sports.az xəbər verir ki, "Kəpəz"in bu balaca azarkeşi 14 il Gəncə klubuna xidmət göstərmiş və hazırki rəhbərliyin heç bir əsas olmadan işdən çıxartdığı keçmiş mətbuat katibi Azad Mustafayevin oğludur.
Babəkin hələ 9 yaşı tamam olmayıb. Qardaşı Hüseyn və babası Rafiq kişi ilə "Kəpəz"i bütün oyunlarda tribunadan dəstəkləməyə çalışırlar.
Babək "Kəpəz"in növbəti turda da qələbə qazanacağına inanır:
- Azər müəllimi və "Kəpəz"i çox sevirəm, komandaya 4-5 yaşlarımdan azarkeşlik edirəm. "Kəpəz" Qəbələdə oynadığı üçün atam yol uzaqlığına görə məni aparmır. Həm də deyir ki, dərslərinə fikir ver. Amma Tovuzda olanda gedirdik. Azər müəllim komandamızın ən yaxşı məşqçisidi, o "Kəpəz"i Premyer Liqada saxlayacaq. Ona hər oyunumuzdan əvvəl uğurlar arzulayıram. İnanıram ki, "İmişli"ni də məğlub edəcəyik”.
