“Qırmızı vərəqə bizi xal itkisindən xilas etdi”
"Qəbələ"nin baş məşqçisi Kaxaber Sxadadze Misli Premyer Liqasının 13-cü turunda "Araz-Naxçıvan"a qarşı keçirdikləri oyundan sonra fikirlərini bölüşüb.
Sports.az xəbər verir ki, o, 2:1 hesabı ilə qalib gəldikləri oyunla bağlı bunları söyləyib:
"Futbolçularımı təbrik edirəm. Onlar xarakter göstərdilər. Bu, çox vacibdir. İki gün əvvəl klub prezidenti ilə çox yaxşı görüşümüz oldu. Ona söz verdik ki, yaxşı mübarizə aparacağıq. Bu gün oyun bir az gərgin başladı. "Araz-Naxçıvan" güclü komandadır, yaxşı hücum potensialına malikdir. Matçın əvvəlində bizdə həyəcan var idi. Buna görə top itkilərinə yol verdik. Qol vurduqdan sonra sakitləşdik və daha rahat oynamağa başladıq. Yenə standart vəziyyətdən qol buraxdıq. İkinci hissəyə yaxşı başladıq. Rəqibə qol imkanı vermədik. Biz çoxlu qol epizodları yaradırıq. Amma onlardan yararlana bilmirilk. Bu gün gördüm ki, bizim potensialımız daha çoxdur. Hələ bir oyun udmuşuq. Qarşıda çox matç var. Bu qələbədən düzgün nəticələr çıxarmalıyıq".
Bizim Elmar Baxşıyevə böyük hörmətimiz var. Həm yaxşı insandır, həm də yaxşı məşqçidir. Sadəcə elə alındı ki, onun komandası ilə matçda qələbə qazandıq.
Çox şadıq ki, Nuğay Rəşidov kimi gənc futbolçu bu gün yaxşı oynadı. Amma onu çox tərifləməyək. Nuğay stabil oynamalıdır. Bu gün Eşqin də yaxşı mübarizə apardı. Nicat zədəli halda oyuna çıxmışdı. Meydanda var gücünü qoydu. Bütün futbolçulara təşəkkür edirəm. Əsl xarakter göstərdilər.
Murad Musayevin son dəqiqələrdə qırmızı vərəqə almasına gəlincə, onun oyunda yeganə səhvi həmin anda gecikməsi oldu. O, tək kapitan deyil, meydanda lider kimi oynayır. Bəlkə də qırmızı vərəqə almaqla bizi xal itkisindən xilas etdi”.
