Futbol millimiz bir tarixin astanasında
Bu gün 21 yaşadək futbolçulardan ibarət milli komandamız Avropa çempionatının seçmə mərhələsində Portuqaliya ilə qarşılaşacaq.
Görüş saat 15.00-da "Palms Sports Arena"da start götürəcək.
İş günü olmadığından futbolsevərlərin bu çətin sınaqda gənclərimizə tribunadan dəstək verməsinə heç bir əngəl yoxdu.
Bu, xüsusən "Neftçi" azarkeşlərinə aiddi. Doğma arenada millimizi dəstəkləmək, mövsümün sonu Kiprə yollanacaq klubun yetirməsi Murad Məmmədova motivasiya vermək zamanıdı.
Portuqaliyanın heyətindəki gənc ulduzları seyr etmək imkanı da tez-tez ələ düşmür.
İdman TV ilə canlı yayımlanacaq oyunu yunanıstanlı hakimlər idarə edəcək.
Bu axşam saat 19.00-da Sumqayıtda Mehdi Hüseynzadə adına stadionda əsas milli komandamız Sent Lüsiyanı qəbul edəcək. Qarşılaşma CBC Sportla canlı yayımlanacaq.
Millimiz bu matçda tarixində ən böyükhesablı qələbəsini qazana bilər.
Komandamızın baş məşqçisi Ayxan Abbasov "Sumqayıt" tarixinə düşüb. İndi isə millidə bunu edə bilər. Təbii ki, sumqayıtlı azarkeşlərin tribunadan köməyi ilə.
Milli komandamızın baş məşqçisi bu qarşılaşma öncəsi tənqid və təzyiqlərlə üzləşib. Əsas səbəb Fransa ilə oyunda zədələnən Şahruddin Məhəmmədəliyevin dəvəti ilə bağlıdı.
Şahruddin milli komandamızın liderlərindəndi. Buna elə belə yox, xarakterinə, xarizmasına görə nail olub. Bəzi futbolçular millidə mükafat, "premiya" davası edəndə Şahruddin komanda yoldaşlarına formanın, bayrağın, gerbin dəyərini anlatmağa çalışan biridi. Bu faktdı, sözgəlişi demirəm.
Dağıstanlı Şahruddin milliyə layiq görülüb pul davası edən bəzi azərbaycanlı futbolçulardan bu formanı geyinməyə daha çox layiqdi! Belə adamların karyerasını bitirəndən sonra da millidə qalıb işləməsində fayda var! Eyni sözləri Bədavi Hüseynov haqda da deyə bilərəm.
Odur ki, Ayxan Abbasovu bu məsələyə görə tənqid etmək yersizdi.
...Baş məşqçinin Yusif İmanovla bağlı suala cavabı kimi...
23 yaş qapıçı üçün çox deyil, elə oyunçu üçün də. Təcrübəli mütəxəssislər, üstəlik də millinin baş məşqçisi belə gəncləri həvəsdən salmaq əvəzinə dəstək verməlidi ki, indi də olmasa, bəlkə gələcəkdə hansısa faydasını görə bilək.
Ümumən, Ayxan Abbasov 1-2 istisnayla ölkənin ən güclü futbolçularını milliyə dəvət edib və bu komandanın axşam Sumqayıtda tarix yazacağına inanıram.
Millilərimizə uğurlar!
