“İlk hissənin son dəqiqələrində dözə bilsəydik…” - Ayxan Abbasov

Azərbaycan millisi bu gün DÇ-2026-nın seçmə mərhələsi çərçivəsində səfərdə Fransa yığması ilə qarşılaşıb.

Sports.az xəbər verir ki, “Park de Prens”də keçirilən oyundan sonra Azərbaycan millisinin baş məşqçisi Ayxan Abbasovun mətbuat konfransı keçirilib. Abbasov 0:3 hesabı ilə məğlub olduqları oyunu belə şərh edib:

“Oyunun çətin keçəcəyini bilirdik. Rəqibin necə hazırlaşdığını da gördük. İlk hissənin son dəqiqələrində dözə bilsəydik, ikinci hissə bəlkə də, fərqli ola bilərdi. Ümumən, futbolçularıma bugünkü əzmkarlığına görə təşəkkür etmək istəyirəm. Üç gün sonra Ukrayna millisi ilə oyunumuz var. Davam edirik. Belə oyunlar təcrübə yığmaq baxımından vacibdir.

Mahir Emreli düşünürəm ki, bu gün ən yaxşı oyunlarından birini keçirdi. Hücumlarımızın alınmaması rəqibdən asılı idi. Mahir bu gün əzmkar mübarizə apardı.

İlk oyunla ikinci arasında fiziki baxımdan fərq var. Dediyim kimi, heyət genişdir. Dəyişikliklərə ehtiyac olarsa, edəcəyik.

O qolu ancaq Mbappe vura bilərdi. Ustalıq səviyyəsi.. İnanın ki, futbolçularım çox çalışdılar ki, qarşısını alsınlar, amma olmadı. Dediyim kimi, o qolu buraxmasaydıq, bəlkə də, ikinci hissə fərqli ola bilərdi.

İkinci qolda hiss edirdim ki, standart vəziyyətdən qol olacaq. Dəyişikliklərə hazır idik, amma o dəqiqədə qol oldu.

Düşünürəm ki, Xaybulla bu gün ən yaxşılardan idi. Sevinirəm ki, əsas heyətdə yerini möhkəmlədirə bilir. Çox çalışdı, yoruldu. Durumu normaldır, yəqin ki, iki günə bərpa olacaq.

Əvvəlki komandadan danışmaq çətin olar. Amma mən bu komandada olmazdan əvvəl də demişəm ki, millidə inkişaf istəyiriksə, sistem olmalıdır. Futbolçularla qısa zamanda bir yerdəyik və inanıram ki, özümüzə bərabər komandalarla yaxşı nəticələr qazanmaq olar”.

Azərbaycan millisi bu mərhələnin növbəti turunda, oktyabrın 13-də Polşada Ukrayna ilə üz-üzə gələcək.